هذى يدى بالخير أمدها لكم فهيا بنا يا شباب المستقبل نرفع من شأن أمتنا العصماء أمة الإسلام ونكتب معا مالا تستطيع صحافة الدنيا نشرة والله هو الموفق

روق بالك





الأحد، 16 مايو 2010

احترس من الخط



احترس من الخط


ليا طلب عند كل الناس بجد نفسى كلكوا تدعولى علشان الإمتحانات ربنا يوفقنى ويوفق كل الناس يارب


عندنا مواد من أصعب المواد فى الدنيا


وغير عشماوى ده( دكتور عندنا )


يعنى الترم ده بايظ بايظ ............... مناهج زبالة ودكاترة مش كويسة وكتب مش واضحة ووقت مش مكفى وأبحاث ورا بعضها


ربنا يستر


يارب أكون صعبت على حد فيكوا بعد كوبليه الشحاته ده وتدعولى بصدق بظهر الغيب وربنا يتقبل






السبت، 24 أبريل 2010

لوغاريتمات الشعب المصرى


لوغاريتمات الشعب المصرى

الشعب المصرى من أحسن الشعوب اللى ممكن تعيش اللحظة بمزاجها لو مضايق يخترع نكتة تضحكة وتضحك الاجيال اللى بعده
لو فرحان يعمل مجنون ويبقى عايز يشل اللى حواليه (قصدى يشيلهم) يرقص بيهم
عادى يعنى شعب بسيط وغلبان أوى عايش يومة علشان يعدى وبس مش علشان هو يوم واتعد عليه وهيتحاسب علية يو مالقيامة

ويااااااااااااااه لما اليوم يعدى بالسلامة يبقى عايز يندر يروح يزور السيد البدوى علشان تستمر الحياة
كمان الناس بتستخدم ألفاظ وحاجات غريبة
الست لما تحس انك هتحسدها تلاقيها ايدها خرمت عنيك ودخلت فى ودانك وطلعت من مناخيرك واتلفت حوالين رقبتك خنقتك لحد لما روحك تطلع بالسلامة
لأ وايه تقرالك الفاتحة وتعمل بالمثل اللى بيقول يقتل القتيل ويمشى فى جنازته
ولما الأم تقول لبنتها يا بنتى عايزة اتكلم مع طنط (صاحبة مامتها )تخرج البنت ماتخرجش
بالضبط كده
والولاد لما تضغط عليهم يروحوا المدرسة ياويلتاه





وللبنات كمان قرب قرب قرب شوف واتفرج فرجة ببلاش
يا حلاوة يا ولاد





طب مالازم يبقى ده الحل الوحيد للهروب من ضغوط واعباء الدراسة اذا كان المدرس بيعمل كده يبقى فى حل تانى غير الهرب

بذمتكوا



معلش بقى يا ولاد المدام عليها المطبخ النهارده

نيجى بقى لهزار الشعب المصرى التقيل أوى أوى



أحسن أحسن موافقلكش على مطالبك أأأأو أأأأوأأوأو إبقى قابلنى يا فالح
بصوا بقى دى




تنتخبوا مين هو دهوه (أصلى مش شايفة اسمه) وحبيبكم مين هو دهوه
انتو فاهمين ولا لأه

ده غير لافتات المحلات الغريبة جدا تخليك تموووووووووت على نفسك من الغيظ

أوعى أوعىيعنى اللى معهوش بابا ميجيش اللى عايز ضرورى يبقى يعمل حسابة ويحنط جثة أبوة علشان تبقى رسمى

وإبقى سلملى عالبابا بتاع إنت

حتى السلام فى الشارع بقى ازيك ياض عامل اية يا ض

والله طلع عندك حق يا أختى الحبيبة فى مقولتك الشهيرة لو لم أكن مصريا لارتحت نفسيا

نيجى بقى لسلام البهايم كما نسمية انا وصحباتى وده نتيجة السلامات الكتير اللى من نوع كتر السلام يقل المعرفة ماهو لما تلاقى صاحبك جاى عليك بيضربك ويقلك ازيك يا مان ولا ازيك يا (ويشتمك)يبقى ازاى العلاقه ممكن تستمر بعد كده

ربنا يعدل حالك يا شعب بيتهيألى بقى الحكومة والدولة ملهاش أى ذنب فى ده ولا دوروا ولزقوا أى حاجة يلا من منطلق علق غلطك على شماعة الحكومة




الثلاثاء، 13 أبريل 2010

للفالحين فقط

للفالحين فقط

حل مشاكلك ومشاكل الجيران والساكنين على أول الشارع كمان مع كلام بكلام بس انت اتصل على ...........
إلى هنا ينتهى الإعلان فيلح طفل على والده (هتثل يا بابا يمتن أتسب ) يقصد طبعا ( هتصل يا بابا يمكن أكسب )
ويوافق الأب المسكين أملا فى تغيير الحال ويفاجأ بالفاتورة التى ترفع حرارته إلى التسعين
ويبدأ النكد والقهر على المصروف من تانى ويخلص الراتب قبل ما الشهر يبدأ
ويا حيييييييييييييييييينى عالمواطن الغلبااااااااااااان
ليه دايما بنمشى ورا الوهم والسراب وبنشترى وجع الدماغ
ودلوقتى بقى وعلى غرار مسلسل النصب ولكن فى شئ من الفكاهة والمقالب بيعملها الناس فى بعض
يعملوا انهم شركة كبيرة وان صاحب الحظ الكسبان هو اللى هما بيكلموه وتتم المكالمة بنجاح لدرجة ان الطرف المضحوك عليه بيكون صدق فعلا ويبتدى يسأل امته هيستلم المبلغ
انا بيتهيألى الشعب المصرى المنحوس المفروض يعرف ان حظة مفيش أحسن من كده(بالعكس طبعا)وميعديش عليه لعب العيال ده
أنا بيتهيألى لو حد عملها فيا حتى ولو كانت بجد يا إما هقفل الخط فى وشة بعد سيل من اللعنات
يا إما هخده على قد عقله واكمل للآخر وافهمه أنه يا عينى وقع فى الفخ مع أكبر منحوس فى العالم
هههههههههههههههه
بيقولوا الشعب المصرى أذكى شعب فى العالم
عايزة أعرف لما حد يفضل قاعد قدام قناة بتجيب سؤال كل 3 أيام والسؤال ولا أتفه من كده (أم مريم عندها4 بنات خوخة ومشمشة وتفاحة يبقى اسم الرابعة ايه)ههههههههههه موزة
ولا اسمعوا دى (اسم ولد من أربع حروف لو شيلنا النقطة من أول حرف يبقى حاجة بنلبسها فى الصوباع)خد بالك بتبقى دهب وأحيانا فضة ..........ايه لسه معرفتوش ههههههههه ذبلة
وتتوالى الاسئلة التى تبين الجهل وعلى الملأ
السؤال يطرح نفسه هنا إلى متى سيستمر مسلسل النصب على المواطن الغلباااااااااااااان أوى ؟؟وإلى من يذهب ربح هذه الإعلانات وبيع الوهم على الناس
يا خساااااااااااااااااارة يا بلد

الخميس، 8 أبريل 2010

بنوتة ..توتة..توتة


بنوتة..توتة..توتة

أكرة كثيراَ الأفكار القديمة مثل الولد يرفع اسم أبوة - الولد يورث أبوة - الولد رمز الرجولة - الولد..........-والولد...........
طظ
صدقونى دى أقوال كانت زمان ممكن نقول صحيحة أيام ما كان الولد بينزل من بطن أمه بشنبات ولد يرضع رجولة وشهامة يدافع عن أهل بيته متغرهوش الدنيا ممكن يكون مش واخد حقة فى التعليم بس راجل بمعنى الكلمة يساعد أبوه فى أرضه ويرجع يواسى أمه ويسلى اخواته لكن دلوقتى لما بسمع إن فى واحد طلق مراته علشان مجابتش الولد بزعل أوى
أنا فى مرة كنت فى مديرية الأمن بجيب حوادث ولقبت حادثتين بشعتين جدا (الأولى )واحد طلق مراته ورماها فى الشارع علشان مجابتش الولد و4 شباب اغتصبوها (الثانية) ولد وضع لابوه السم فى الأكل علشان عاقبه بنقصان المصروف
يبقى ليا حق أزعل ولا لا
والله العظيم أنا بحمد ربنا كتير أوى إن ليا أخ واحد نعرف نسيطر علية ونربية كويس أنا يمكن مبدعيش لنفسى قد ما بدعيله بخاف عليه جدا خايفة يبقى زى الشباب اللى بشوفهم وبضايق أوى لما بشوفهم
طيب انا هعملكم مقارنة بين بعض الولاد والبنات وانتوا احكموا وخدوا بالكم من كلمة بعض علشان مش عايزة مشاكل
*البنت اللى أنا أعرفها هادية ومطيعة لبسها شياكة بس فى حدود العادات والتقاليد والإسلام
-الولد صوتة يخرم طبلة الأذن صوابعة وشفايفة اسودوا من السجاير لسانه نسى ذكر الله من المعاكسات والشتيمة وكلمات الحب المعسولة دا أنا حتى اتخدعت فى شخصيات كتير أوى كنت بحترمها جدا ولقيتها على العكس تماما لا تستحق الاحترام بيلاقى نفسه ازاى وهو ماشى ورا بنت بيعاكسها وممكن تبص له بصة مش كويسة ازاى الناس بعد كده تحترمه
*البنت بتساعد مامتها فى البيت هى سر مامتها والحضن الدافى لاخواتها
-الولد يا إما بيضرب اخواته ومزهق أهله ياإما طفشان من البيت واللى فيه
*البنت بتذاكر بجد وبتحاول إنها تكون حاجة كويسة
-الولد ضاربها طناش ولو حضر محاضرة بيغلس على اصحابه ويشوش أفكارهم
وبرضة فى بنات على العكس تماما لو شفتها تستعيذ بالله منها وولاد ماشاء الله عليهم يشرفوا بجد
وعلشان محدش يزعل وياخد الكلام على نفسه أنا هتكلم عن نفسى ومن غير أى ذرة انحياز للبنات وكمان دى مش مقارنة بينى وبين أى ولد من الولاد مش عايزة حد يفهمنى غلط أرجوكم
بالنسبه للبس:أنا كنت أرتدى الخمار ولكن نظرا لظروف عملى وانتقالى من مكان إلى مكان وخجلى من مصافحة العملاء الذين سأجرى معهم حوار كما كنت بعود بالخمار بايظ كل يوم بحاجة شكل إما مقطوع أو متوسخ وفى مرة الخمار شبك فى العربية اللى كنت ركباها وانا نازلة ولكن الحمد لله السواق أخد باله ووقف بس الخمار اتقطع وفى يوم كان فى شخصيه مهمه جاية فى شبين ومعايا تصريح دخول ولكن الأمن مرضيوش يدخلونى بسبب الخمار بعدها
نصحونى استبدله بطرحة علشان كده اضطريت إنى أخلعه وألبس طرحة طويلة وطبعا وقتها اتعرضت لانتقادات كثيرة كنت أنا الأقوى وإتغلبت عليها لبسى دلوقتى واسع وطويل وطرحة كبيرة والحمد لله ماشية
بالنسبة للبيت:أنا فى البيت الطفلة المدللة زى ما بيقولوا (مفيش غيرها)رغم إن فى غيرى كتير والله بس أنا الكبيرة وأول فرحة العيلة وبرضة زى كل البنات بعمل كل حاجة فى البيت برجع من الجامعه أو الشغل أنظف البيت ويوم الجمعة (يوم النظافة العالمى)غسيل وتنظيف وغيره بحب عيلتى أوى أنا سر كل واحد فيهم بيشكولى همومهم وبشاركهم برأيي
مع الأطفال أنا طفلة زيهم بل أضل سبيلا بجرى وبلعب وأضحك وأرسم وأغنى وأحكى حواديت
وبرضة بنام على رجل جدتى زى الأطفال تحكيلى حدوتة كلما شاء القدر
يكفينى أبقى داخلة من باب البيت ألاقى الفرحة فى وجوة الجميع برجوعى والأطفال حواليا بيتسابقوا علشان يحكولى إيه اللى حصل النهاردة ويشكولى (مفيش أجمل من كده)
فى المطبخ أنا مش قد كده بس ماما بتعلمنى على فكرة ماما طباخة بريمو بشهادة الجميع وإن شاء الله هكون زيها
بالنسبة لمستقبلى :بحب الدراسة جدا وبحب الدكاترة بتوعنا وبحب شغلى وأمنية حياتى إنى أكون دكتورة فى الأدب ومزيعة
بالنسبة للحب والإعجاب :مظنش إنى حبيت لحد دلوقتى لكنى أعجبت بشخصين فقط مش معنى كده إنى غريبة الأطوار لكن مش أى حد أحبة أو أعجب بية وما لقيتش فى كل اللى اتقدمولى شخصية عجبتنى رغم إنهم مراكز كويسة ومستويات عالية علشان كده محصلش نصيب
أنا عايزة حد يفهمنى ويشاركنى رأيي ويكون أخويا وأبويا وكل حاجة فى حياتى يطلع الحاجات الحلوة اللى جوايا ويربط خيوط احلامة بخيوط أحلامى ونحققها مع بعض وأهم حاجة يحب أهلى ويكون أخ لأخويا الوحيد لان اللى هيوافق عليه اخويا هو اللى هخليه يشاركنى حياتى
فى الشارع :بمشى فى حالى لكن مفيش مانع إنى ابتسم لراجل عجوز وادغدغ طفل صغير
هاتولى بقى ولد بيعمل كده انا عملت المثال عليا لكن فى أمثلة تانية أحلى بكتيييييييييييير منى
يبقى الولد أحسن ولا البنت فى الوقت الحالى

الأربعاء، 24 مارس 2010

إعدام ميت


إعدام ميت

تنتشر هذه الأيام خزعبلات كثيرة حول العدد الصينية التى اجتاحت السوق المصرى وأصبح المصريين يشرهون بالشراء منها

بصراحة هى مغرية جداًيعنى عدة بتشيل خطين وكمان بعضها فيه تليفزيون وراديو ومميزات تانية كتير أوى خلت الشعب المصرى كلة كبير وصغير شايلين عدد

وزى ما كل الناس اشترت كله دلوقتى عايز يبيع

تبيعوا إيه بس؟

العدة أصلا بتشتريها ب300 جنيه من غير ضمان لا وإية أنا فى مرة قريت لافتة فى محل بيع موبايلات بتقول المحل غير مسئول عن أى عدة صينى بعد خروجها من المحل

طب بالله عليكم لما هى من غير ضمان والمحل غير مسئول عنها يبقى ليه تقع فى المحظور وتشتريها

ولما تحب تبيعها بالكتير أوى تجيب 100 جنية يعنى تكمل عليهم وتشترى دبدوب صغير

ده كلة وبنقول مش لاقيين ناكل ومش لاقيين نشرب ومفيش حاجة الدولة موفراها يعنى الدولة تعمل إية ؟

تمشى ورا كل واحد وتقول يا جماعة متخلوش حد يضحك عليكم

الحكومة ما عليها غير إنها بتضع القوانين اللى بتحمى الشعب إحنا بقى بنعمل إيه؟

بنحط ثغرات فى القانون علشان نبيح لنفسنا كل حاجة وأى حاجة ونخلى الحرامى حاج والحاج بن.......

احنا اللى ضيعنا نفسنا

يعنى كل واحد فينا شايف إنه فى إيده حاجة ممكن الناس تشترى منها يبتدى يعلى السعر والناس يا عينى مجبرة تشترى

ده بيخلى اللى اشترى الحاجة دى غصب عنه يطلع عين الناس التانية فى حاجة تانية

خنقنا نفسنا

بوظنا الدنيا وخربناها

ليه وصلنا للحد ده

الموبايل بقى اللى بنتكلم عنه ده (الصينى )ممكن يكون اللى اخترعة واحد معداش 16 سنه بس لقى الإمكانيات اللى تخلية مخترع

يا ترى ده منه هو ولا من الدولة

أنا بيتهيألى بلاش نرمى كل حاجة على غيرنا ليه احنا منعدلش من نفسنا ونعمر الدنيا من حوالينا

دا أنا حصلى موقف غريب جدا خلانى أحس إنى مختلفة عن الناس

فى مرة كنت بنظف البيت فبكنس الفرانده واتكسفت اسيب الزبالة فى الشارع فكنست الشارع راحت جارتنا تقولى متقلليش قيمتك يا بنتى وتكنسى الشارع وتخلى الناس تتفرج عليكى أنا مكنتش عارفة أرد أقول إيه بس قلتلها يا حاجة أنا فى الأول والأخر بنت ولازم أعمل كل حاجة والنظافة شئ ميعيبش حد وبعدين اللى هيتفرج عليا ده مش ممكن يشوفنى برضه وأنا بنظف البيت من جوه وأصلا هو أنا كام مرة بنظف هو أنا فاضية

هى دى السلبية

فيها إيه لما تمشى على طبيعتك وتسيبك من كلام الناس

كل إنسان فينا جواه خير بس لو استغله صح دا ربنا نفخ فينا من روحه يعنى أكيد فينا ولو1.......,من صفات الله عز وجل يبقى لازم نعمل اللى يرضى ربنا عننا وبلاش سلبية وكل واحد يمشى بدماغة فى إطار العادات والتقاليد اللى اتربينا عليها

ونسيب الصين فى حالها ونشتغل احنا

بدل ما فى يوم من الأيام نلاقى العرسان كمان بقت صينى

ياااااااااااااااااااااااااااااااااااااااااااااااااااااااااااالله

الثلاثاء، 16 مارس 2010

عيد بلا أم



تعودت كل عيد أم أن أقبل أمى من جبينها رغم أنى يوميا أقبلها ولكن فى هذا اليوم بالذات بتبقى القبلة دى حاجة تانية وطعم واحساس تانى خالص

ماما بصراحة من أجمل الأمهات اللى فى الدنيا إنسانة متواضعة جدا تحترمنى وتحترم عقليتى التى تفتحت مبكرا تسمعنى وأشكولها بتحبنى جدا دايما أسمعها بتحكى عنى كويس

أنا كمان كل أصحابى بيحسدونى عليها ومش مصدقين أصلا إنها مامتى ودايما يقولولى إزاى واحدة ملاك زى مامتك واسمها نور الهدى تجيب عفريتة زيك وكمان اسمك سحر

علشان كده سمونى حور نور تبعا لاسم ماما وانا كمان بحب الاسم ده اوى ومشهورة بيه دا انا حتى قربت انسى اسم سحر

فاسم حور لأنهم يعتقدون أنى حورية من السماء كما أطلقها على مدرسى المدرسة الثانوية وأصدقائى ومن حولى من الناس نسبة لأخلاقى معهم وتعاملاتى الطيبةأما نور فهو الاسم الأول من إسم أمى

أمى بقى هى أجمل شئ فى حياتى بحبها أوى ونفسى أقدم لها أى حاجة فى عيد الأم

وبمناسبة عيد الأم بقى كنت بعمل تحقيق عن عيد الأم اسمة عيد بلا أم وأم بلا عيد

بصراحة كان نفسى أكمله وأنشره بس بلدنا دى بلد تصريحات وعلشان أدخل أى مكان لازم أدخل بتصرح وعلشان تجيب التصريح دى عايزة سنه تكون المناسبة خلصت وياريت أصلا التصريح بيطلع

أنا بقى رحت ملجأأيتام فى بنها وكان يوم جمعة قلت بقى ايه أروح كأنها زيارة عادية وبدون أى صفة رسمية دخلت وقعدت مع الأطفال اللى جوة بصراحة حبيتهم جدا وكمان كانوا بيقولولى يا ماما أنا قضيت معاهم وقت جميل جدا حمدت فية ربنا على نعمة الأم

وبعد ما خلصت وأخدت صور وسجلت مع الأمهات فى الدار حصلت حاجة غريبة

بنوتة زى القمر عندها 16 سنه جات جنبى وقالتلى انتى اسمك ايه قلتلها اسمى سحر قالتلى عندك كام سنه قلتلها عشرين قالتلى ياااااااه دا إنتى صغيرة أوى

ضحكتلها وقلتلها يااااااااه وانتى كبيرة أوى

المهم البنت دى كانت خلاص عايزة تتكلم معايا بخصوص موضوع أو عايزة تشتكى من حاجة بس للأسف المشرفة جات والبنت غمزتلى علشان أسكت فسكت المشرفة أصلا شكلها يخوف لابسه نظارة بنى وهى أصلا أعوذ بالله من الصنف ده عاملة زى المخبر ياترى عاملة اية فى البنات دى

كان نفسى أعرف البنت دى كانت عايزة تحكيلى ايه بس مقدرتش أعرف ومشيت ومكانش ينفع أروح تانى إلا بتصريح حلفت إنى لازم أروح تانى علشان أعرف بس فى ايه البنت دى مالها وعايزة تقول ايه وليه خايفة أوى كده وليه المشرفة مرضيتش تقعدنى معاها

رحت مديرية الأمن علشان أجيب تصريح الضابط بصراحة قابلنى كويس لأنه يعرفنى قبل كده كنت بروح أجيب منه الحوادث قاللى التصريح مش من عندنا روحى المحافظة رحت المحافظة وقابلت مدير العلاقات العامة اللى قابلنى باحترام شديد ولما قلتله عالتصريح قاللى والله يا بنتى انتى عارفة أنا بحبك قد ايه بس التصريح دة مش من عندنا روحى مديرية التضامن الاجتماعى

رحت المديرية وقابلت الوكيل راجل خنيق جدا اسمه استاذ جمال مرضيش يدينى تصريح ولا حاجة وكأنه خايف إنى أدخل هناك أحسن أفضحهم

معرفش بصراحة ايه اللى مخوفهم

ودلوقتى مش عارفة أعمل ايه أو أقابل البنت دى إزاى داأنا حتى معرفش اسمها علشان أسأل عليها فى المدارس

ربنا يكون فى عونها وعون اللى زيها فعلا والله الأم دى نعمة كبيرة جدا ربنا مايحرمش أى أولاد من أمهم ويخليكى ليا يا ست الحبايب يا حبيبة

الاثنين، 8 مارس 2010

وادبست فى جوازة


وادبست فى جوازة

ياريتنى ما عاكست ابنها ولا ركبت القطر أصلا

قطر إيه ياريتنى ما خرجت من بيتنا من الأساس

بداية القصة

وزى كل يوم خارجة رايحة الجامعة كان عندى محاضرة الساعه 11

وركبت قطر الساعة 9 اللى بيوصل بلدنا اصلا 10 الا ثلث يعنى قمة الذل

لا وإيه النهارده الاثنين يعنى فى سوق فى بنها والستات القمامير راكبين بقى والقطر محمل من خيرات ربنا

(أقفاص واسبات وشنط وأرانب وبط وفراخ وكل حاجه )

طيب والنبى الناس معاها الحاجات دى وهى رايحة السوق تخيلوا بقى وهما جايين بيبقى شكل القطر ازاى

أنا بقى متعودة أركب فى العربية الثالثة من القطر مع اصحابى المرة دى ملحقتهاش فركبت فى العربية الرابعة وكنت وانا واقفة شايفة اصحابى وعمالين يشاورولى ويضحكوا ورجعوا علشان ياخدونى ويطلعونى العربية التالته بس انا مستحيل انى اتحرك جوه القطر يعنى اذا عرفت اتنقل بين العربيات مش هسلم من التعليقات السخيفة من الشباب

فاضطريت انى اقف لوحدى ومن وقت للتانى ابص لاصحابى واضحك

والحمد لله وقفت جنب ست زى القمر وابنها عثول مووووووووووووت وعمال يضحكلى وماسك فى ايده بسكويت ضحكتله واديتله مصاصة كانت فى شنطتى وقعدت العب معاه واتكلم هو بقى حب يردهالى كان عايز يدينى بسكويت ومامته تقولى خديه ده مش بيدى لأى حد الظاهر إنى عجبته

أخدت البسكويت منه علشان ماكسفهوش وحطيته فى ايدى

الولد بقى راسه وألف جزمة إنى أكلها قدامه يابنى مش عايزة

مفيش

والله مش عايزة

ولا كأنه سامع حاجه

اضطريت فى الأخر إنى أكلهاوسط تشجيع المتفرجين وضحكات العواجيز

وتتالى الكلمات والتعليقات

يابنتى كليها ده لسه زغنون\ متتكسفيش ياحلوة\دا قد أخوكى الصغير

وفجأة وبدون أى مقدمات

الولد مسك إيد مامته وقالها ماما أنا عايز أتجوزها

مش قادرة أقولكم أنا وشى جاب ميت لون وأنا بقى بعيد عنكوا خدودى بتحمر ومش بعرف أدارى كسوفى والدنيا فجأة حررت وإسودت

والضحك ملى العربية والعيون ابتدت تتابعنى

الولد جه جانبى وقالى ها موافقة أنا بابا عاملى شقة وفيها كمبيوتر وألعاب كتير تقدرى تلعبى بيها لوحدك أنا مش عايزها وكمان هجيبلك مصاصة وشيكولاته وحاجه حلوة وهخلى ماما تعملك من الجيلى بتاعى

أنا احترت الولد واخد الموضوع بجد بينى وبينكم فرصة مش هتتعوض جيلى وشيكولاته ومصاصة يا حلاوة يا ولاد جوازة ولا فى الأحلام

المهم ضحكت وقولتله بص يا حبيبى مش اللى عايز يتجوز واحد ة يقول لأهلها الأول

الود طلع متفهم جدا وقالى ماهما مش هيوافقوا لأنى لسه صغير قلتله طيب ايه رأيك استناك لما تكبر كل ده وانا مش سامعه ولا صوت فى القطر غير صوتى الكل واقف بيسمع مندهش

وفى الأخر وصلنا والولد ماسك فى ايدى ومش عايز يخلينى أنزل وياإما ينزل معايا ياإما أروح معاه قلتله انت هترجع فى قطر الساعة كام ؟

قالى مش هنرجع فى القطر علشان بابا هياخدنا بالعربية

المهم فى الاخر الولد مرضيش ينزل إلا لما مامته شدته بالعافية وفضل يعيط

اتضح بقى انه وحيد يا عينى ومالوش اخوات يلعب معاهم ومعندوش صحاب فى المدرسة لانه لسه داخلها جديد اصلهم لسه راجعين من السعودية

وضيعت جوازة ولا فى الأحلام


الجمعة، 26 فبراير 2010

أقبل الليل


أقبل الليل



تعودت فى كل موقف أتعرض له أن أستمع إلى أى شئ يخفف من حده ما أنا فيه إما أغنية أو قصيدة شعر أقرأها فأهدأ

اليوم عدت من عملى مبكرة ساعتين أى عدت فى الرابعة عصرا وشاء القدر أن أعود فى هذا الوقت بالتحديد حتى لاأتعرض لجرعة الخير الزائدة التى أعطتها السماء اليوم مكافأة للأرض من مطر ورعد وبرق

عندما عدت إلى المنزل تناولت وجبة المرضى (الريجيم)ومع شوية تمارين حسيت بسخونة فى جسمى وعرق فى البرد اللى احنا فيه ده أخدت دش دافى وخرجت إلى السرير مباشرة لأستريح من تعب اليوم حيث إننى أحاول أن أنهى كل مواعيدى وعملى قبل أن أنتقل إلى زحمة الدراسة والمذاكرة .أفنيت نفسى بصراحة

وعلى السرير استسلمت للنوم الذى لم أرد أن أنجو من بين براثنه إلا فى اليوم التالى ولكن إذا خططت لشئ لا يحدث كما هو حيث استيقظت فى الخامسة والنصف على أصوات صراخ عالى (واحنا ماشاء الله فى بيتنا عيال كتيير والضيوف أكتر والباب دائما مفتوح لايغلق فاجتماعات مجلس الشارع وشكاوى الناس دائما فى حوزة جدتى الطيوبة المحبوبة)

المهم الصراخ ده كان لأن الجو بيمطر جامد والعيال واقفين تحت المطر وعمالين يصرخوا وعايزين يصحونى العب معاهم تحت المطر لأنى باكون زى الطفلة بس يا عينى انا صعبانه عليهم لانى تعبانة ومش قادرين حتى يتجهوا نحو السلم للصعود إلى غرفتى

وفى النهاية صحيت على صوت الرعد ولم أدرى فى ذلك الوقت أن السماء بتمطر فتحت عينى وقومت لأضيئ النور لكن للأسف النور مقطوع

أول ما خرجت ولقيت السما بتمطر رفعت ايدى ودعيت ربنا أدعية كتير نصها مش فاكراه لأنى كنت نص مستيقظة وبعد لما خلصت نزلت تحت راحوا مصرخين فى وجههى وقالوا (الدنيا بتمطر يا أبلة سحر)

ضحكت وقلتلهم تعالوا جوه علشان متبردوش ودخلنا وقعدت أحكيلهم حكايات وحاجات كده من اللى بحبها أنا والأطفال الصغيرين ولعبنا مع بعض

وفى الأخر جبت كرسى وقعدت فى الفراندة الضيقة أمام بيتنا رغم خجلى الدائم من الجلوس فى هذا المكان لأن المارة يروا من بالداخل بس برضة بحب المكان ده أوى وبنظفه بنفسى وبكتب فيه وبقرأ فيه الجرائد والقصص وهو أنسب مكان بالنسبالى لقراءة الشعر بس طبعا ما بذاكرش فيه لأنى بحب مكتبى جدا وبحب أذاكر عليه واشتغل كمان عليه

الدنيا ظلمة أوى ومفيش قمر قلت هو ده الوقت المناسب علشان اقعد فى مكانى المفضل وجلست أستمع إلى أم كلثوم (أغنية أقبل الليل) واندمجت معها وأنا أنظر إلى السماء من حين لأخر وأكتب فى الظلام

ولما النور جه لقيت عفاريت فى الورقه اللى كنت بكتب فيها فخفت ودخلت أصلا مكنتش عارفة ولا شايفة بكتب ايه

وده كان اخر يوم من أيام الأجازة الجميلة الواحد بقى يشد حيلوا شويةعلشان الدراسة

ادعولى أصل النتيجة هتظهر الأسبوع ده

ربنا يستر

الثلاثاء، 21 يوليو 2009

من أنا .....لست أدرى


من أنا

عايزة أعرف أنا هو أنا ولا مش أنا

عايزة أفهم فين أنا مين أنا فين من الحب أنا

قلبى محبش ولا مرة والحب دق على بابه كتير

هو أنا معنديش قلب ولا أنا قلبى كبير

شغلنى هذا التساؤل كثيرا ويوما أردت إجابة فوقفت أمام مرآتى رأيت بداخلها أخرى غيرى اندهشت لرؤيتها سألتها من أنتى؟ قالت أنا نفسك ودار بيننا حوار

أنا: ماذا تفعلين فى مرآتى أقلعى عنها أرجوكى

نفسى:لا أستطيع الخروج منها إلا بعدما تذهبين عنها أولا فأنا لم آتى هنا بإرادتى بل أنتى أحضرتنى عنوة لأظهر لكى مفاتنكى وأغريكى وأقول إنكى أجمل الناس كما تريد كل الفتيات

أنا: لكنى لا أريد منك كل هذا بل لا أريدك أنت

نفسى:اذهبى أنتى أولا وسوف أذهب وإذا رجعتى عدت

أنا : انتظرى ..هل تستطيعين الاجابه عن تساؤلاتى ؟

نفسى: نعم إسألى

أنا: من أنا

نفسى :أنتى إنسانة بسيطة تكرهين الروتين تحبين التغير نشيطة فى مجال عملك يشكل السفر والترحال شئ أساسى من تكوينك الذاتى

أنا: أعلم أننى ناجحة فى حياتى ولكن قلبى...

نفسى: وماذا بقلبك؟

أنا : لا أعلم . أخبرينى أنتى هل أحببتُ يوما ؟

نفسى :لا تضحكين على نفسكى بكلمة الحب فأنتى لم تحبى يوما ولم تعشقى

أنا :ولماذا لم أحب يوما رغم علمى بمن يحبوننى ويعشقوننى ؟

نفسى:أنت تعلمين مدى حب الناس لكى لكن لم يسيطر على قلبك أحدا وإذا كنتى قد وهمتى نفسك بالحب ذات يوم فقد ظلمتى من أحبك فأنت لا تستطيعين الحب بل لا تعلمين ما هو الحب فالحب عندك سوف يكون شيئا عاديا مخالفا لإرادتك المتحررة سيكون تقليديا وسيأتى شيئا فشيئا ولكن عليكى أولا أن تضمنى أن حبك لن يضيع هباءا

أنا:ولكننى أشعر أننى أحببت حقا

نفسى حذرتك ألا تخدعى نفسك وتقولى أحببت فأنتى لم تحبىولكنك أعجبت بشصيخة كذا وطيبة قلب كذا ومع ذلك أخبرينى هل قلتى يوما لأحد أنك تحبيه ؟

أنا : لا لم أفعللكنى كنت أشعر أننى ..............................

نفسى:لا تكملى فأنا هى أنتى وأناأعلم بكى منكى تريدين المغامرات فى الحب والرومانسية المطلقة . الحب بلا حدود ولم تجديه الى الآن إذا فكيف أحببت ؟

أنا : لكنى لا أريد أن أفعل كل هذا إلا مع من أيقن أننى له وأيقنت أنه لى

نفسى سوف تجدين من يحبك ويرعاك ويتق الله فيك كما تتقى الله فيه وتعيشين مغامرات الحب الشيقة وتدركين لذة الحب الحقيقية ومعناه الذاتى الذى فقدتيه وتعلمين أنك كنت هائمة على وجه وأردت الهداية فاهتديتى وفقك الله ورعاك وسدد خطاك ورزقك بمن يريح قلبك ويتم سرورك وهناك

الخميس، 25 يونيو 2009



الهوا هوايا


عندما يضيق بنا الحال نلجأ ولو لساعات معدودة إلى من يرسم على وجوهنا الابتسامة كما نحتاج إلى من يرفع معنويا تنا




بعدما انقطعت لفترة طويله عن الكتابه والتواصل معكم ولم يكن عندى أية أعذار أقدمها لكم سوى الاكتئاب والعزلة فاقترفت خطأ أقبح من ذنب أن تباعدت عن الكتابة التى أبثها شكواى وقلمى الذى ينطق بلسانى وورقتى التى ملت التمزيق




لكنى الأن عدت قوية كما كنت دائما وجدت من يشد من أزرى ويحثنى على الكتابة وسوف أستمر ولن أنقطع


انتهت فترة الانهيار العصبى (الامتحانات) كما انتهت فترة المصيف رغم كونها أحلى أيام هذه السنة أياما ممتعة استجمعت فيها قواى رأيت أقاربى الذين لا تجمعنا بهم سوى الأفراح والاحزان ماأحلى أن تجد شبابا من نفس سنك تلعبون معا وتتسامرون وتتجاذبون أطراف الحديث كنا نسهر لفترات غير معلومة ولا نشعر بالوقت نخرج معا ونرى مناظر خطيرة إنها حقا مصر


أما الان أحمد الله على عودتنا سالمين


سوف تنعكس هذه الروح الرائعة على مشروعنا المنتظر الذى مللتم انتظارة ولكن أحب أن أبشركم بقدومه واقترابه




إلى كل من بثنى روح الحماسة


إلى كل من شاركنى أحزانى و أفراحى


إلى كل أصدقائى من المدونين والمدونات




شكرا لكم وجزاكم الله كل خير






ملحوظة :أريد من كل من يقرأ هذا البوست أن يقترح اسما للمجله الجديدة وإلى كل من يريد المشاركة فليضف ايميله على الميل

ehnamasr@yahoo.com


ehnamasr@gmail.com


السبت، 28 مارس 2009

تحديث
انا فخورة جدا إن فى ناس كتير أوى عايزة تشارك معانا فى مشروعنا الجديد(جمهوريه شباب مصر) والحمد لله ده من فضل ربنا علينا
إن فى شباب واعية ومدركة قيمة العمل الجماعى
اللى عايز يشارك معانا يضيف الميل ده عنده عالياهو او الجيميل
ehnamasr@yahoo.com
ehnamasr@gmail.com
وفعلا ان شاء الله هنكون احنا مصر
يلا بسرعة سجلوا علشان العدد قرب يكتمل
والله هو الموفق

السلام عليكم
ازيكم
عاملين ايه والحياة عاملة فيكوا ايه
بصوا بقى انا عايزة اقولكوا على حاجة مهمه اوى وعايزاكوا تساعدونى للى يقدر يساعدنى
المهم
انا بصراحه مش لاقيه صحافة جاده وكل حاجه فى البلد دى متفبركه انا عن نفسى بقول كده لأنى شفت حاجات كتير باعتبارى صحافيه على بدايه السلم وشكلى كده عمرى ما هوصل اصل بلدنا الروتين فيها بيعل ويشل اللى ناوى يطلع سلالمه ويهدها فوق راسه لو آوح
انا بقى فكرت فكرة ممكن تعجبكوا ويارب تعجبكوا
انا قررت اننا نعمل مدونه لنفسنا ونسميها جمهوريه شباب مصر ودى نكتب فيها كل اللى احنا عايزينه من اخبار ومقالات هى طبعا هتكون زى مدوناتنا بس الفرق ان دى هتكون مشتركه بين ناس كتيريدخلوا يكتبوا اللى هما عايزينه طبعا ده تحت اشراف ورعايه حريصه جدا
واكيد وباعتبار ان كل واحد مننا من بلد هيقول اخبار بلده والمساوئ اللى فيها ونتكلم بصراحه ونعمل بريد للقراء ودين وثقافه واخبار عالميه ومحليه وابراج وكاريكاتير وكل حاجه وهيكون معانا طبيب نفسى للى عايز وكمان هنعمل افكار جديده هنطرحها مع بعضينا بس نستقرونتفق على حاجه
ياريت كل واحد ينشر على مدونته الخبر ده ولو فى حد عايز يشارك ممكن يعلق على الموضوع ويكتب عايز اشارك فى الجريده الجديدة
وبكده كل واحد يعبر عن نفسه ويطلع اللى جواة
شكرا ليكم وطظ فى الروتين الحكومى


الخميس، 19 مارس 2009


اسمعونى وصدقونى
فإنى لست بمجنونة

أنا انسانة أمضيت
حياتى فى نفسى مكنونة

رأيت كثيرا و
سمعت مالا تسمعونه

أتصدقوننى إن قلت
رأيت ملاكا حنونة

استودعتها سرى
وفتحت لها قلبى شجونه

خففت عنى ألامى
وأحزانى المخزونة

اذا ابتَسَمَت رََأَيت
الكون تفتحت عيونه

وإذا ضَحَكَت كأن زلازالاً
أفاق قلبى من سكونه

يا ويلتى إن أغضبتها
تعصف كالعاصفة المجنونه

وتهدأ رويدا رويدا وتأتى
إلى فى سكون حزينه

وتسألنى إن كنت غضبت
من ثورتها المزعومه

تأخذنى إلى صدرها
وتسكننى قلبها عيونه

وتقطف إن تستطع زهرة
عمرها وتهديها إلى ممنونه

أتعرفون من هى ؟
هى وردة بيضاء فى حديقه

هى نهر خالد يمر بين
ضلوعى فيرويها بمياهه الوفيرة

هى فراشه تنتقل بين
عيونى مسروره

هى الشمس المضيئه للسماء
وهى البدر الساطع نوره

هى أمى وأنا لعمرها أيامه المعدوده

السبت، 7 فبراير 2009

ميت وش

ميت وش



حتى إنت يا زينهم يا سلحدار تطلع منهم وأطلع أنا حمار وأنا عمال أجيبلك إشى تفاح وإشى عدس وفول مدشوش وخيار
أكيد طبعا عرفتوا البوست ده بيتكلم عن ايه ما أنا عارفاكوا شاطرين جدا
انا حابة أتكلم فى البوست ده عن الانسان أبو وشين
كل واحد فى الدنيا بيقابل ناس كتيييييييييييييييير أوى بياخد عنهم فكرة لكن هما بيطلعوا حاجة تانية خالص
وممكن برضه تقابل واحد تحس انه طيب أوى وينفع تصاحبة وتأمنه على سرك بس للأسف بيطلع غير مستحق للثقة دى
بتحصل كتير المواقف دى
بس الحمد لله الواحد برضة علشان طيب ربنا يخلية يقابل ناس كويسين وبيكشف لية الناس الوحشة على حقيقتهم
مواقف فى حياتى
وأنا فى الثانوية كنت مصاحبة بنتين زى القمر وطيبين جدا وكنا احنا الثلاثة اسمنا ثلاثى أضواء المسرح
وكان سرنا مع بعضنا وكنا بنعمل مقالب تشيب شعر المدرسين
بس برضوا كنا واقفين جنب اصحابنا ايد واحدة
دى حتى الامتحانات كنا بنجيب فيها زى بعضنا مش بالغش والله بس مش عارفة ازاى رغم إن المدرسين كانوا بيفرقونا عن بعض فى الإمتحانات
اعتقد إن الناس كانوا بيحسدونا على الصداقة دى والظاهر والحمد لله إن عين حد فيهم جات فى محلها وفرقت الصحوبية دى
وفجأة اتقلبت كل الصداقة دى إلى عداوة وأشد من كده مش عارفة ليه وبدون أسباب أو مقدمات تجنبونى وبقيت لوحدى
مقدرتش طبعا أصاحب حد تانى غيرهم لأنى كنت مصدومة فيهم لفترة طويلة وحاولت إنى أعرف اية السبب فى بعدهم عنى لكن معرفتش
المهم
هما مااكتفوش بإنهم يبعدوا عنى
لكن قالوا حاجات عنى محصلتش لدرجة إن بنات كتير قعدوا يضايقونى بكلامهم كل ما أمشى قدامهم
لكن سبحان الله وإذ فجأة حست المدرسة بتاعت العربى بكده وفهمتنى إنهم بيغيروا منى علشان جبت أعلى منهم فى الإمتحان الأ خير
أنا بقى صعقت من الكلام ده وحسيت بخجل كبير أوى إنى كنت مصاحباهم
وفضلت لمدة يومين متواصلين أعيط لأنهم طلعوا كده
ماما قالتلى إن ربنا أكيد كشفهملى علشان ربنا بيحبنى والمفروض إنى أحمد ربنا وإن ربنا هيعوضنى بصديقة أحسن بكتييييييييير منهم
وفعلا ربنا إستجاب لماما وبعد السنة دى ما خلصت أنا تعبت شوية وملقيتش حد جنبى غير واحدة بس من صديقاتى اسمها بيدل على شخصيتها طيبة جدا الوحيدة اللى وقفت جنبى
كانت بتذاكرلى اللى فايتنى من الدروس
وتجيبلى المدرسين بتوعها لحد البيت عندى وتيجى تاخد معايا دروسى
أنا حبيتها جدا وبصراحة هى كمان كانت بتحبنى ولحد دلوقتى أنا بقلها إنتى دعوة ماما المستجابة وصحوبيتنا ممتدة بقالها 5سنين
مقلتلكمش:
لما تعبت البنتين اللى أنا قلتلكم عليهم زارونى وبدأوا يرجعوا صداقتهم ليا تانى وأنا محكمتش عقلى وقلت مش مشكلة يمكن هما عرفوا إنهم غلطانين فى حقى
ورجعت تانى صاحبتهم بس برضه مسيبتش صاحبتى اللى وقفت جنبى ورغم إنها حذرتنى منهم إلا أنى قلتلها إنهم وقفوا جنبى فى محنتى ولازم مخذلهمش
ورجعت ريمة لعادتها القديمة
لما لاقونى منحازة لصديقتى الجديدة الغيرة ملت قلوبهم وفضلوا يعملوا فينا مقالب
لكن المرة دى أنا أخدت قرارى بنفسى إنى عمرى ما هثق فى أى حد إلا بعد لما أعرفة أولا كويس أوى
والحمد لله دلوقتى ربنا رزقنى باصحاب كويسين فى الجامعه وكفاية إنى برتاح لهم وبنقف مع بعض فى الخير إيد واحدة
ربنا يديم صداقتنا

الأحد، 1 فبراير 2009

دين فى رقبتى









دين فى رقبتى



أخيرا آن الأوان وهحل التاج بتاعك يا شوشو



التاج ده جالى من البنت المشمشية



وطبعا لازم أحلة



:



:



:



:



:






يلا بينا



السؤال الأول:



مبسوط من اسمك ولو مش بتحب اسمك كان نفسك يبقى اسمك ايه ولية؟



بصى يا ستى انتى عارفة إنى ماليش اسم محدد يعنى أصحابى بينادونى بأسماء كتير



وكلها عاجبانى بصراحة



لكن لو كنت هختار اسم تانى غير اسمى فأنا هختار أحب اسم إلى قلبى وهو (براء)




ا لسؤال الثانى:




أهم حلم فى حياتك ؟



بصراحة معنديش حلم معين بس عندى أحلام كتير أوى لكل الناس يعنى مثلا نفسى أقابل الأنسان اللى ممكن أحبة ويحبنى ويكون قدرى ونصيبى

وكمان نفسى الحب يسود الدنيا كلها

وأهم حاجة نفسى أجيب تقدير كويس السنة دى







السؤال الثالث:






تجوز البنت اللى بتحبها قبل الجوواز
ولاتجوز واحدة تانية مشيت مع غيرك ؟

أكيد طبعا السؤال ده لأصحابنا من المدونين وممنوع للبنات إنهم يجاوبوا






السؤال الربع:






لو نفسك تعمل مدونة تانية ممكن تكون بتكلم عن ايه ؟

أنا فعلا عندى مدونة تانيه بس على مكتوب وأسمها مشاعر بريئة وأوعى أشوف وشك هناك

أحسن إنتى حرة كفاية علينا هنا





السؤال الخامس:





للبنت ممكن تتخلى عن حاجات كتير من مغيرات الحياة عشان انسان ؟

طبعا ممكن أوى أتخلى عن حاجات كتير علشان إنسان لأنة مش هيكون أى انسان وأكيد هيأثر فيا وأثر فية ونكون احنا الاتنين أحلى بكتير من اللى أحنا علية دلوقتى





السؤال السادس:





6/لو في ايدك تحكم مصر لمدة24ساعة ممكن تعمل ايه؟

ياااااااااااة داأنا هعمل حاجات كتييييييير أوى بس إنتى قعدينى على الكرسى وليكى عليا أحط علية أمير قبل ما اقعد علشان ما قومش تانى


وبكدة مش هيلاقوا حل غير أنى أتولى الحكم علطول وأهم قرار هاخده هو اعدام شوشو





السؤال السابع:





انتا شايف ان محمد حسنى مبارك عامل ازاى
وهو وحش للدرجادى ولا الراجل بردو بيعمل اللى عليه وان بلدنا احسن من غيرها؟

والله أنا شايفة إن الراجل عامل اللى عليه وكفاية انه بيحل كل المشاكل بالسلم ومجنبنا الحروب

ربنا يكرمة ويطول فى عمره





السؤال الثامن:





ايه اكتر حاجة تخليك مبسوط فى االدنيا ؟

أكتر حاجه بتخلينى فرحانة هى إنى ارسم البسمة على وجوة أصحابى وأشوفهم فرحانين حواليا





السؤال التاسع:






ايه اللى ممكن ينكد عليك حياتك فى لحظة ؟

أكتر حاجة بتوجعنى هى الخيانة لكن اللى بينكد عليا لما بكتب شعر وملاقيش حد يسمعه وبالذات ماما لما بتكون مش فاضية





السؤال العاشر:





ايه رايك فى البت مشمسية حلوة حلوة بس شقيه ؟

عسوله وأمورة وفيها حاجات كتير نفسى أغيرها فيها على مستوى الصداقة

بس بجد عاملة شغل جامد

الأربعاء، 28 يناير 2009


مع سبق الاصرار والترصد

الحمد لله الامتحانات خلاص خلصت بحلوها ومرها

رغم ان اخر امتحان كان حلو حبتين وخرجنا كلنا معيطين

بس خلاص كلة خلص والحمد لله

وعبرنا القنال ياولاد

زغرطوا يا ولاد

وبعدين غطونا وصوتوا


المهم ان النتيجه مش هتظهر غير لما ندخل الترم التانى ودى حاجه حلوة اوى اوى





سيبكوا من كل التهييس اللى فوق ده:



ركزوا هنا


انا عملت مخطط جامد اوى اوى للاجازة وطبعا كالعادة اول يوم طلع فشنك

صحيت من النوم خير اللهم اجعلة خيرلقيت جبل من الغسيل وماما الأمورة العسولة قال لبسة هدوم الخروج ورايحة عند خالتى

وسمعت كده وانا بغسل وشى ان انا اللى هغسل الهدوم دى

صبرنى يا رب

لا وايه كل حاجة جاهزة

الغساله -والمساحيق- والاهم الغسيل اللى هيتغسل

وابتدى ابتدى ابتدى المشوار

وقضيت اجمد يوم فى حياتى بين الغسيل ونشير الهدوم وغسيل الاطباق

ولكن ماما لحقتنى فى الاخر

وطلعت نمت لكن بعد ايه

بعد ماانتهى اليوم وفضلت نايمة نايمة نايمة بحلم بالاجازة اللى انا ظبطها فى مخى مع سبق الاصرار والترصد


وشكلها كده هتحكم عليا بانى اقضى باقى الاجازة نايمة فى السرير

وهى دى عقوبة اللى يحلم ازاى هيقضى الاجازة

سيبوها للظروف

عموما مش مشكلة اول يوم احلى حاجه فى اجازتى ان شاء الله انى هبتدى اروح الجريدة تانى واكتب من جديد بعد ما كل اصحابى اللى هناك وحشونى زيكم بالضبط

ومن هنا وجاى هتابع اصحابى من المدونين والمدونات علشان ايام اللعب انتهت

والايام الجاية هتكون احلى ان شاء الله

وكفاية كده بقى علشان انتوا شكلكوا كده صدعتوا

يلا سلااااااااااااااااااااااااااااااااااااااااااااااام

والى اللقاء فى مغامرة جديدة من مغامرات ايام الاجازة

الأحد، 18 يناير 2009


شاطر



شاطر شاطر شاطر وهوديه القناطر

اللى يقولى بيعمل ايه يخلى ربة يرضى علية

وماما تدعيله وبابا والناس تقول دا برافو عليه
خليك صرح مع نفسك وقول اية الحاجة الحلوة اللى عملتها فى حياتك ورضيت بيها الناس من حواليك
خليكوا عارفين إن الكداب بيروح النار ويخاصمه كل الشطار


الخميس، 8 يناير 2009



المصريين أهمه

كلنا عارفين المثل اللى بيقول :

طبعك ولا اشتريته

وأكيد برضه عارفين معناه كويس أوى إنه مهما حاولنا نغير من أسلوبنا عمره ما هيتغير


لأن ديل الكلب عمره ما هيتعدل فالوحش هيفضل وحش والكويس هيبقى كويس طول عمره


لأن الطبع غالب ولو انضربت بألف قالب


شوفوا بقة التقدم ده


الحكومة المصرية بصراحة بتشجعنا على الندالة والتطنيش واللى يجى فى الريش يبقى بقشيش


وطنش تعيش


ولنعرف أهمية الندالة فى حياتنا اليومية:



نصائح ندلة للشعب المصرى

**لما تلاقى حريقة فى شقة جارك

سيب شقتك بسرعة واهرب على السلالم بهدوء تام وانفد بجلدك واقنع نفسك أنها مجرد نار هما

اللى عملوها علشان يطبخوا عليها لأن الأنبوبة خلصت


**لما تلاقى شاب بيحاول اغتصاب فتاة فى عز النهار وهى بتصرخ علشان تنقذها

بص بسرعة الناحية التانية أو ممكن برضة تسيب الرصيف كله ليهم واقنع نفسك إن هى اللى رايحة

معاه بمزاجها


**لما تلاقى ست ماسكة رقبة راجل وحاطاها تحت رجلها وفى ايديها التانيه ماسكة سكينة

يبقى أكيد دى ست وزوجها وإنت لازم تخلى عندك دم ومتدخلش فى الحاجات العائلية دى

انت برضه ممكن يكون ليك دور إيجابى فى الحكاية دى وتناولها أكياس بلاستيك علشان تعبى

فيهم المرحوم



ملحوظه صغنونة أوى :

كل الكلام ده مش رأيى أنا

ده رأى شباب حاسين إن الحكومة المصرية بتشجعهم على كده

وكمان أعذرونى فى الأمثال اللى ذكرتها لأنها برضه مش كلامى


على فكرة :

فكرة البوست دى تعبتنى جدا لأنى محبيتش أقول رأيى لوحدى

وبما إنى صحافية ناقشت الشباب ونشرت رأيهم

الأربعاء، 31 ديسمبر 2008





شكر الله سعيكم





أكيد كلنا فرحنا لما سمعنا إن الرئيس مبارك فتح معبر رفح لمصابى غزة



بس للأسف



ده محصلش غير لمدة يوم واحد بس وبعد كدة اتفقل المعبربسبب تصريح الرئيس مبارك بإن معبر رفح لا يمكن فتحه فى غياب المراقبين الاوروبيين


وبعدين استقبلنا فى مصر فى يوم فتح المعبر حالات كتييييييييييييير جدا من المصابين فى معهد ناصر بالقاهرة


ومستشفى العريش العام

وأتم الأطباء المصريين دورهم على أكمل وجه


دلوقتى بقى


القوات المصرية على الحدود بتعترض طريق 10 سيارات مساعدة لأهالى غزة من العبور من معبر رفح



طيب تيجى ازاى ------------وايه التناقض ده


المهم


انتوا عارفين ان عدد الشهداء فى غزة وصل إلى 390 شهيد و1800 جريح



شوفوا بقى الإستفزاز ده




صرح سفير اسرائيل فى غزة أن تواصل الهجوم على غزة يعتبر نقطة من ألف نقطة مخطط لها من قبل


كما ان الغارات الاسرائيلية على منطقة رفح جنوب قطاع غزة يمتد أثرها إلى داخل الحدود المصرية


فما معنى هذا التصريح؟

الحدق يفهم----------والدور علينا يا بشر



بصراحة الاتحاد الأوروبى عمل اللى علية ودعى إلى توقف إطلاق النار على غزة



تفتكروا هو ده الحل



أكيد ده معناه عجز عربى رسمى عن صد العدوان



وهو ده هدف اسرائيل حتى لوكان العدوان فى غزة لوحدها


بس برضوا قادرين ينشروا الرعب على مناطق الحدود وأولها مصر




ودلوقتى حكام العرب الله ----يكرمهم ---- بيقوموا بدورهم


دول حتى بيحاولوا انهم يعملوا هدنه مع اسرائيل لمدة 24 ساعة




ربنا يستر




الاثنين، 15 ديسمبر 2008


عيد ميلاد فى المستشفى


شوفتو ا الجنون

عملتها فعلا واحتفلت بعيد ميلادى 18 فى المستشفى الجامعى ببنها


بصراحة:..............................................


كان أجمل عيد ميلاد احتفلت به فى حياتى


جاءتنى هذة الفكرة المجنونة حينما أردت أن أرسم البسمة على وجة صديقى المريضة (فتاة حادثة القطار)


كان جميع من يزورونها يحتفلون بالعيد وهى ترقد متألمة فى المستشفى وحدها ليس يشاركها عيدها إلا خالها
عندما علمت بذلك اتصلت بها وأخبرتها أنى سوف أحضر لها مفاجأة واتصلت بأصدقائى وأخبرتهم فاحتاروا
قالت أيه:أنا بخاف من مفاجاتك ياسحر

أما سمية فقالت:ربنا يستر

اتفقنا على أن نجتمع فى اليوم التالى (ثانى أيام عيد الأضحى)أمام باب المستشفى لنصعد سويا

نفذنا اتفاقنا

أحضرت أيه معها ابنة عمتها كما أحضرت أنا ايضا ابنة عمتى واشتريت التورته والشمع كما أحضرت مجموعة من البالونات الملونة وانتظرنا أمام المستشفى التى لا تبعد عن منزل صديقتنا الثالثة (سمية) سوى بضع خطوات وخمس ادوار سلالم بتذلنا بيهم كل يوم

وأخيرا حضرت سمية مع صديقتها سندس وصعدنا إلى صديقتنا المريضة

لن تتخيلوا مدى فرحتها كادت أن تبكى ولكن منعناها وضحكنا معها وشرعنا نحتفل بعيد الميلاد وضعت التورته على الكرسى ووضعت بها شمعة بحر ف(s)

استدرت للجميع وقلت ( حرف ايه ده يا جماعة رد الجميع حرف ال(s)قلتلهم يلا بقى اللى مش فى اسمة حرف ال(s)يتفضل يخرج )ضحك الجميع ورأيت البسمة قد أنارت وجه صديقاتى ففرحت كثيرا

بدأنا نأخذ صورا معها ومع التورتة وأخذنا نغنى أغنيات عيد الميلاد وقدمنا لها الهدايا
أردت أن أطير فى الفضاء فيكفينى سعادة اصدقائى من حولى


الجمعة، 5 ديسمبر 2008


ليتنى كنت كافرة


وقعت على سمعى كالصاعقة فكأنما وقعت فى هوة عميقة فى نهايتها نار أظن ان هذه الكلمه غير مقصودة ولكن ................

البداية:

امرأة فى الأربعين من عمرها تمتلك من الأبناء خمسة( ثلاث بنات وولدان ) توفى زوجها وهم حديثى السن تكلفت فى تربيتهم الكثير من العناء والمشقة تحملت عناء مرضهم وحدها كانت تذهب الى المستشفى كل اسبوع بأحد ابناءها مريضا وكانت تحمد الله أنهم معها فقط اشتهرت هى وأبناءها بين المستشفيات فمنهم من يُجرى له عملية ومنهم من يجبس ذراعه وأخر يجبس قدمه وتوالت عليهم الامراض كانت تشكر الله ولم تيأس من رحمته

وفى يوم من الأيام :

جاءها نبأ وفاة ابنها الأكبر فصرخت وقالت أين هو أريد أن أراه فأخذوها إليه فوجدته محولاً إلى أشلاء مجمعة فى كيس كبير

صرخت ولطمت وجهها وارتمت بالأرض مغمًاعليها

وفى عذاء ابنها:

جاء الناس يعزونها فى ابنها ويصبرونها على ابتلاء الله لها وتتالت الكلمات والجمل

( اصبرى فلقد سبقك إلى الجنة ---- المؤمن منصاب --- كل مايزيد الابتلاء كل ما يكون ربنا فاكرك)

قامت مرة واحدة وشقت جلبابها وصرخت وقالت إذا كان الله يذكر عباده المؤمنين بهذا القدر من المصائب والابتلاءات

فيا ليتنى كنت كافرة


أه ثم أه ثم أه

ليس الصبر بالكلمات ولكن الصبر بالعمل وإيقان القلب بالرضا

بالصبر والسلوان
سؤال بسيط :

ماذا تفعل إذا استيقظت ذات يوم ولم تجد يدك ورجلك فى جسدك ؟

أما هى ففقدت يدها ورجلها فى حادثة قطار ظلت فى الرعاية المركزة ثلاثة أيام لم تدرى أنها فقدت أعضاء من جسدها لأنها كانت تحت تأثير البنج كنا نزورها يوميا فرحنا كثيرا لأنها كانت معافاة فلم نكن ندرى ما حدث زرتها فى اليوم التالى بعد اقناع أهلها بأنها هى التى طلبتنى فى اليوم الأول فأدخلونى لها وقفت أمامها ابتسمت كما هى عادتى فقالت لى (قطعولى ايدى ورجلى ) انفطر قلبى وقتها ولكنى تمالكت نفسى أردت أن اضحكها فقلت لها جملتى المعهودة لمن يبكى(اه هو انتى بقى بتعيطى علشان جايبنلك مناديل كتير طيب انا مش معايا مناديل امسح فى الخمار بقى ولا ايه)فابتسمت والدموع فى عينيها بدأت اضحكها بطريقتى الخاصة التى يعجز أى انسان على عدم الضحك أمامهافابتسمت وضحكت احسست وقتها اننى نجزت انجاز وبعدما خرجت من عندها لم أتمالك نفسى من البكاء ودخلت فى شخصية أخرى غير شخصيتى الحقيقية لم يصدق أصدقائى الحالة التى كنت فيها فأنا دائمةالضحك حتى ولو ورائى هموم الدنيا كلها لا أتحمل بكاء أو زعل أحد وأحاول إضحاكه بكل ما فى من إفيهات وفى هذا الوقت وكما كنت أُضحك الجميع أبكيت الجميع وخاصة عندما علمت أن والدها لم يكن موجود فى اليوم الأول لأنه كان يدفن أعضائها المبتورة فقلت حينها فى قلبى المفطور من البكاء ستعيش نصفها حى ونصفها ميت ربنا يصبرها

أدعو الله لها بالصبر والسلوان

أرجو من كل من يقرأ هذا الموضوع أن يدعو لها

الاثنين، 1 ديسمبر 2008




الإعجاز فى كلام المصطفى الممتاز

ما زال العلم يقف عاجزاً أمام قدرة الله (سبحانه وتعالى)وأحاديث الرسول (صلى الله عليه وسلم)

فبعد مرور أكثر من 14 قرن من الزمان على بعثة المصطفى(ص) يؤكد العلم الحديث صحة ماجاء به النبى (ص) من أحاديث نبوية ونحن لا نشك فى ذلك
فقد قال المولى (عز وجل ) فى حقه \ وما ينطق عن الهوى إن هو إلا وحى يوحى/.........................

روى الإمام البخارى ومسلم فى صحيحيهما أن رسول الله (ص)قال (كل عظم بن آدم يبلى إلاعجب الذنب منه خلق بن آدم ومنه يركب )

والأن قدم عالم امريكى ما زال على قيد الحياة واسمه انطونى جوستين بحثا فى مدينة الكويت و يعمل فى مجال الوراثة الجذعية


(ملخص البحث)

اخذ العالم عظمة الذنب وحجمها لا يزيد عن حبة العدس وأجرى عليها بحوث علمية فوجد فى تلك العظمة خلايا جذعية وموجود مثلها فى خلايا النخاع تحمل برنامج وراثى كامل ينمو حولها الجسم كله

بعدما أخذ هذا العالم خلية من عظمة عجب الذنب وخليه أخرى من النخاع وزرعهما فى رأس ضفدعة فوجد أن الخلية التى أُخذت من عجب الذنب قد عادت إلى مكانها الطبيعى فى أخر فقرات الظهر وهو مايسمى بالعصعص
بينما الخلية التى أخذت من النخاع ظلت مكانها
والشئ الأغرب وكما يقول هذا العالم أنه وضع على الخليتين سائل كيماوى قاتل ويبيد كل شئ يلامسه فكانت المفاجأة أن الخلية التى أخذت من عجب الذنب لم تمت بينما الخلية التى أخذت من النخاع ماتت

وهذا يؤكد بلا شك

أن الرسول صلى الله عليه وسلم صادق فيما قاله من أن الجسد كله سيصبح ترابا إلا عجب الذنب

حيث سيركب الانسان مرة اخرى يوم القيامة من هذه العظمة

فيال قدرة الخالق فيما خلق وأبدع