بنوتة..توتة..توتة
أكرة كثيراَ الأفكار القديمة مثل الولد يرفع اسم أبوة - الولد يورث أبوة - الولد رمز الرجولة - الولد..........-والولد...........
طظ
صدقونى دى أقوال كانت زمان ممكن نقول صحيحة أيام ما كان الولد بينزل من بطن أمه بشنبات ولد يرضع رجولة وشهامة يدافع عن أهل بيته متغرهوش الدنيا ممكن يكون مش واخد حقة فى التعليم بس راجل بمعنى الكلمة يساعد أبوه فى أرضه ويرجع يواسى أمه ويسلى اخواته لكن دلوقتى لما بسمع إن فى واحد طلق مراته علشان مجابتش الولد بزعل أوى
أنا فى مرة كنت فى مديرية الأمن بجيب حوادث ولقبت حادثتين بشعتين جدا (الأولى )واحد طلق مراته ورماها فى الشارع علشان مجابتش الولد و4 شباب اغتصبوها (الثانية) ولد وضع لابوه السم فى الأكل علشان عاقبه بنقصان المصروف
يبقى ليا حق أزعل ولا لا
والله العظيم أنا بحمد ربنا كتير أوى إن ليا أخ واحد نعرف نسيطر علية ونربية كويس أنا يمكن مبدعيش لنفسى قد ما بدعيله بخاف عليه جدا خايفة يبقى زى الشباب اللى بشوفهم وبضايق أوى لما بشوفهم
طيب انا هعملكم مقارنة بين بعض الولاد والبنات وانتوا احكموا وخدوا بالكم من كلمة بعض علشان مش عايزة مشاكل
*البنت اللى أنا أعرفها هادية ومطيعة لبسها شياكة بس فى حدود العادات والتقاليد والإسلام
-الولد صوتة يخرم طبلة الأذن صوابعة وشفايفة اسودوا من السجاير لسانه نسى ذكر الله من المعاكسات والشتيمة وكلمات الحب المعسولة دا أنا حتى اتخدعت فى شخصيات كتير أوى كنت بحترمها جدا ولقيتها على العكس تماما لا تستحق الاحترام بيلاقى نفسه ازاى وهو ماشى ورا بنت بيعاكسها وممكن تبص له بصة مش كويسة ازاى الناس بعد كده تحترمه
*البنت بتساعد مامتها فى البيت هى سر مامتها والحضن الدافى لاخواتها
-الولد يا إما بيضرب اخواته ومزهق أهله ياإما طفشان من البيت واللى فيه
*البنت بتذاكر بجد وبتحاول إنها تكون حاجة كويسة
-الولد ضاربها طناش ولو حضر محاضرة بيغلس على اصحابه ويشوش أفكارهم
وبرضة فى بنات على العكس تماما لو شفتها تستعيذ بالله منها وولاد ماشاء الله عليهم يشرفوا بجد
وعلشان محدش يزعل وياخد الكلام على نفسه أنا هتكلم عن نفسى ومن غير أى ذرة انحياز للبنات وكمان دى مش مقارنة بينى وبين أى ولد من الولاد مش عايزة حد يفهمنى غلط أرجوكم
بالنسبه للبس:أنا كنت أرتدى الخمار ولكن نظرا لظروف عملى وانتقالى من مكان إلى مكان وخجلى من مصافحة العملاء الذين سأجرى معهم حوار كما كنت بعود بالخمار بايظ كل يوم بحاجة شكل إما مقطوع أو متوسخ وفى مرة الخمار شبك فى العربية اللى كنت ركباها وانا نازلة ولكن الحمد لله السواق أخد باله ووقف بس الخمار اتقطع وفى يوم كان فى شخصيه مهمه جاية فى شبين ومعايا تصريح دخول ولكن الأمن مرضيوش يدخلونى بسبب الخمار بعدها
نصحونى استبدله بطرحة علشان كده اضطريت إنى أخلعه وألبس طرحة طويلة وطبعا وقتها اتعرضت لانتقادات كثيرة كنت أنا الأقوى وإتغلبت عليها لبسى دلوقتى واسع وطويل وطرحة كبيرة والحمد لله ماشية بالنسبة للبيت:أنا فى البيت الطفلة المدللة زى ما بيقولوا (مفيش غيرها)رغم إن فى غيرى كتير والله بس أنا الكبيرة وأول فرحة العيلة وبرضة زى كل البنات بعمل كل حاجة فى البيت برجع من الجامعه أو الشغل أنظف البيت ويوم الجمعة (يوم النظافة العالمى)غسيل وتنظيف وغيره بحب عيلتى أوى أنا سر كل واحد فيهم بيشكولى همومهم وبشاركهم برأيي
مع الأطفال أنا طفلة زيهم بل أضل سبيلا بجرى وبلعب وأضحك وأرسم وأغنى وأحكى حواديت
وبرضة بنام على رجل جدتى زى الأطفال تحكيلى حدوتة كلما شاء القدر
يكفينى أبقى داخلة من باب البيت ألاقى الفرحة فى وجوة الجميع برجوعى والأطفال حواليا بيتسابقوا علشان يحكولى إيه اللى حصل النهاردة ويشكولى (مفيش أجمل من كده)
فى المطبخ أنا مش قد كده بس ماما بتعلمنى على فكرة ماما طباخة بريمو بشهادة الجميع وإن شاء الله هكون زيها
بالنسبة لمستقبلى :بحب الدراسة جدا وبحب الدكاترة بتوعنا وبحب شغلى وأمنية حياتى إنى أكون دكتورة فى الأدب ومزيعة
بالنسبة للحب والإعجاب :مظنش إنى حبيت لحد دلوقتى لكنى أعجبت بشخصين فقط مش معنى كده إنى غريبة الأطوار لكن مش أى حد أحبة أو أعجب بية وما لقيتش فى كل اللى اتقدمولى شخصية عجبتنى رغم إنهم مراكز كويسة ومستويات عالية علشان كده محصلش نصيب
أنا عايزة حد يفهمنى ويشاركنى رأيي ويكون أخويا وأبويا وكل حاجة فى حياتى يطلع الحاجات الحلوة اللى جوايا ويربط خيوط احلامة بخيوط أحلامى ونحققها مع بعض وأهم حاجة يحب أهلى ويكون أخ لأخويا الوحيد لان اللى هيوافق عليه اخويا هو اللى هخليه يشاركنى حياتى
فى الشارع :بمشى فى حالى لكن مفيش مانع إنى ابتسم لراجل عجوز وادغدغ طفل صغير
هاتولى بقى ولد بيعمل كده انا عملت المثال عليا لكن فى أمثلة تانية أحلى بكتيييييييييييير منى
يبقى الولد أحسن ولا البنت فى الوقت الحالى
هناك 11 تعليقًا:
عزيزتي ..
ربما عرفتي (ذكورا) في حياتك و لكنك لم تعرفي (رجالا) الى الان ..
و لهذا قلتي كلمة طظ ! بالفم المليان و لكنك لو عرفتي كيف هم (الرجال) و ما قدر النساء عندهم لما قلتيها ..
ردي يطول كثيرا في هذا الموضوع لذا انصحك بقراءة
كيف نقييم الانثى في المجتمع ؟
http://www.sharmlifeblog.com/2010/02/blog-post_2126.html
كيف تصبح رجلا ؟
http://www.sharmlifeblog.com/2010/03/blog-post_29.html
لان هذان الموضوعان هما ردي
نسيت ان اشكرك على دعوتك لي لقراءة الموضوع و نسيت ايضا ان اخبرك انك حتى لو ازلتي خمارك يبقى حسن اخلاقك و اجهة مشرفة لكل مسلم
شكرا لك
السلام عليكم
باين الانحياز التام للبنت ودى بطبيعة كونك بنت
عارف انك صلحتى دا بعدين بس بما انك صحافيه تعرفى النوع من الطرق دى انى اقعد اشتم اشتم وبعد مخلص اكتب سطر صغير ليس له واقع ومن وحى الخيال
او مش الكل
او فيه وفيه المفروض كنتى كتبتى السلبيات بتاع الطرفين والايجابيات بتاع الاتنين وتسيبى الناس تقول فى تعليقاتها وتختار يعنى زى ما بتقول الصحافه كده مكنش منحاز لحد اكون على الوسطيه مش كده برضه
اولا ياستى محدش ينكر ان فيه بنات ملايكه
بس برضه الملايكه خلصت وبقى فيه بنات ملتزمه
زى برضه الاولاد فيهم الطيب والخبيث
مش كده ياحور ولا يا ف
دكتور شارم
قبل مااقولك شوفتنى ونورتنى كالعادة هقولك انى فعلا بتكلم عن الولاد وليس الرجاله والدليل انى قلت فى مرحلة الجامعه والمقارنه كانت على هذا الاساس
لانى فعلا معاصرة الفترة دى والشباب دول وأنا بنت زى بقيت البنات بتعرض للمعاكسات والمضايقات والتحرشات مما دفعنى ان العن وبالفم المليان ولاد هذا الجيل أرجو أن تكون تفهمت موقفى
وبالفعل شرفتنى ونورتنى يا دوك
صدفة جميلة
أحب أعرفك إنى هنا لست صحافية ولا أكتب شيئا يمت إلى الصحافة بصلة لانى لا أكتب مقالا ولكنى أكتب تجربتى التى اعاصرها الأن كفتاة من جيلى الذى ظلمت فية معظم الفتيات كما ظلم فية معظم الشباب
حقا صدق من قال الحسنة بتخص والسيئة بتعم
وبعدين انا مش منحازة للبنات بالعكس أنا نفسى بضايق لما بشوف ينت لفتت انتباهى انا بلبسها امال الولاد يعملوا ايه
وبردوا مش كل البنات ملايكة عندك حق لكن أكيد فى ولو واحد فى المليون يستحقوا اننا نكتب عنهم ونشاركهم حزنهم
شكرا لمرورك
اسلوبك روعه هى فعلا مبقتش فيه مبادئ الرجوله والشهامه بتاعتنا يامصريين بدأنا نفتقد معانى جميله جدا المعانى دى كانت بتكلم عننا و بتخلينا نحس قد إيه احنا جــُمال خلاص المعانى بداءت تنفذ و بدأنا نشوف نفسنا قد غيه احنا سيئيين لا ولد عاد ولد ولا بنت عادت بنت كل شئ اصبح شئ تانى لإن كل واحد مبقاش عجبه حاله و عايز يكون حد غيره فمبقاش لا هو ولا بقه غيره
لا بقينا مصريين واحتفظنا باصلتنا وشهامتنا ولابقينا غربيين و عرفنا نكون زيهم لإن فيه شئ جوانا بيمنعنا ده غير دينا ده غير ان احنا ميلقش علينا التوب ده خالص و لا بتليق على لسانا الكلمات دى خالص
وانا معاكى ايتها الصحفيه الجميله إن الأخلاق بقت فى مستوى متدنى جدا جدا
و ده بيرجع الى ان الجيل ده مترباش بنفس الشكل اللى اتربى عليه الجيل اللى فات
او مترباش خالص و الشباب ولاد وبنات بقوا مشيين كده تشكل أخلاقهم فضائيات ووسائل انترنت و هما فى سن مراهقه و اللى موجود حاليا أخلاقه كويسه و حاله صالح اما اتربى كويس واما مترباش بس هو جواه انسان كويس وشخصيه رائعه لم تنقاد خلف ما انقاد خلفه الجميع
تحياتى
احمد
شكرا لك أحمد على الرأى الجميل ده
أنت بجد قلت اللى انا كنت عايزة أقولة كل اللى أنا عايزة أوصلة أن دلوقتى بقت البنت بتعمل حاجات أحسن من الولد يبقى ليه الراجل يطلق مراته علشان الولد بقى ماهو لو عارف أنه لو مرباش الولد ده صح ممكن يعمل فيه إية مكنش عمل كده
شكرا لمرورك يا أحمد
السلام عليكم
حور من رب الملوك خلقها على ارضنا تزين وتنور الملكوت
لا تستطيع ان تحاكيها كلمات ولا تكفيها سطور ومهما كتبنا سيكون كلامنا نجمه فى سماها موجه فى بحورها رمله فى كونها لانها ملكت قلوب واثرت عقول وتعلمت منها كل البنات كيف تكون الحياه زينه مش بلاء هههههههههههه
حور
هناك من العقول والاجساد تدعوا الى التفاخر والبهاء
ولكنها فى حقيقة الامر حقيقة اشخاص بلهاء
اعطاهم الله كثيرا من الامور وافضل الاباء
ولكنهم اضاعوا النعمه وجروا وراء السراب فباتت حياتهم خراب وصاروا غير امناء على حياتهم او على زويهم فالقوا بثوب العفه وارتدوا ثوب البغاء
وهناك غيرهم من الشباب الشرفاء
من ولدوا بدون جاه او اباء
ولكن اصرارهم رسم لهم ونحت اسمائهم فى افضل قوائم الشرفاء
نسوا كل شر واهتدوا للصواب
انستى العزيزه
لا تساعفنى الكلمات ان ارد على كلماتك ولكنك مثل جميل اتمنى ان تحتزى به الكثير من الفتايات
بس برضه فيه شباب كتير بجد اتحملوا المسئوليه قبل الاوان ورسموا باديهم مبادئهم وطريقهم فى الحياه عرفوا الصواب وابتعدوا عن كل سوء واعتقد زى ما انتى حبيتى تقولى ان فيه بنات كويسه
لازم تقولى ان فيه شباب كويسه وكمان الموضوع بيكون صعب على الشاب بحكم انه بيخرج للدنيا بدرى قبل البنت اقصد بيخرج للشارع وبيتعامل وبيسهر وكمان بيخرج لسوق العمل الاول
لكن البنت بنت تجد الكل مهتم بيها
من الاخر انتى شخصيه جميله
باى
ايوه يا سيدى على المقالات الجميله دى
بصى بقى كل شخص فى الدنيا دى اتخلق علشان يقوم بوظيفه محدده كون اننا اتخلقنا ولد ولا بنت دا يبقى ليه حكمه يعلمها لربنا انا معاكى ان فيه بنات كتير شاطرين قوى قوى وفيه كمان ولاد بسم الله ماشاء الله عليهم
بس دلوقتى الاووضاع اتغيرت كتير وبقى للبنت حقوق زى الولد تمام
بس برضه الولاد بيتعبوا اكتر بقى
صدفة جميلة
عاجبنى أوى اهتمامك بالموضوع شكلك عايز تفهمنى حاجة معينة أنا أصلا فاهماها
بص يا سيدى زى ما قلت قبل كده ان انا بتكلم عن فترة معينة فى عمر الولاد مش هقول الشباب كمان
فترة انا معاصراها وعارفة ايه اللى بيحصل فيهاومش بكلم عن كل الولاد برضة لان فيهم ناس كويسه
بس بجد اللى استفزنى وخلانى أكتب البوست ده ان فى واحد أنا اعرفه وفى مستوى تعليم مش قليل شفته بيعاكس بنت هى صحيح جميلة بس مينفعش انه يعمل كده وبعدين الحكاية مكانتش كلام وبس استفزنى بجد وعلشان كده احترامى له قل وملقتش حاجة انفس بيها عن نفسى غير انى اكتب البوست ده بالطريقة الجارحة دى وبرضة مجمعتش كل الولاد واستخدمت المثال عليا انا علشان محدش يزعل مش معنى كده انى ملاك لا طبعا برضة فى اخطاء كتير بقع فيها
وشكرا عالكلام الجامد ده صدقنى انا ماستالهوش وبعدين انا مش عاملة المثال على نفسى علشان تقول الاطراءاللذيذ
شكرا لمرورك الجميل
رووووووووووووووومانسى
اهلا يا منوفى لالا وسع المنايفة وصلوا يا معلم انت اكيد خارج المنافسةانتو الكل فى الكل شباب زى العسل
بص يا سيدى بالنسبة للبوست المزعج ده
انا مبتكلمش عن كل الولاد وده بقولة للمرة المليون وكمان انتو رجالة عديتوا مرحلة الولدنة
شرفتنى يا منوووووووووووووفى
إرسال تعليق