هذى يدى بالخير أمدها لكم فهيا بنا يا شباب المستقبل نرفع من شأن أمتنا العصماء أمة الإسلام ونكتب معا مالا تستطيع صحافة الدنيا نشرة والله هو الموفق

روق بالك





السبت، 7 فبراير 2009

ميت وش

ميت وش



حتى إنت يا زينهم يا سلحدار تطلع منهم وأطلع أنا حمار وأنا عمال أجيبلك إشى تفاح وإشى عدس وفول مدشوش وخيار
أكيد طبعا عرفتوا البوست ده بيتكلم عن ايه ما أنا عارفاكوا شاطرين جدا
انا حابة أتكلم فى البوست ده عن الانسان أبو وشين
كل واحد فى الدنيا بيقابل ناس كتيييييييييييييييير أوى بياخد عنهم فكرة لكن هما بيطلعوا حاجة تانية خالص
وممكن برضه تقابل واحد تحس انه طيب أوى وينفع تصاحبة وتأمنه على سرك بس للأسف بيطلع غير مستحق للثقة دى
بتحصل كتير المواقف دى
بس الحمد لله الواحد برضة علشان طيب ربنا يخلية يقابل ناس كويسين وبيكشف لية الناس الوحشة على حقيقتهم
مواقف فى حياتى
وأنا فى الثانوية كنت مصاحبة بنتين زى القمر وطيبين جدا وكنا احنا الثلاثة اسمنا ثلاثى أضواء المسرح
وكان سرنا مع بعضنا وكنا بنعمل مقالب تشيب شعر المدرسين
بس برضوا كنا واقفين جنب اصحابنا ايد واحدة
دى حتى الامتحانات كنا بنجيب فيها زى بعضنا مش بالغش والله بس مش عارفة ازاى رغم إن المدرسين كانوا بيفرقونا عن بعض فى الإمتحانات
اعتقد إن الناس كانوا بيحسدونا على الصداقة دى والظاهر والحمد لله إن عين حد فيهم جات فى محلها وفرقت الصحوبية دى
وفجأة اتقلبت كل الصداقة دى إلى عداوة وأشد من كده مش عارفة ليه وبدون أسباب أو مقدمات تجنبونى وبقيت لوحدى
مقدرتش طبعا أصاحب حد تانى غيرهم لأنى كنت مصدومة فيهم لفترة طويلة وحاولت إنى أعرف اية السبب فى بعدهم عنى لكن معرفتش
المهم
هما مااكتفوش بإنهم يبعدوا عنى
لكن قالوا حاجات عنى محصلتش لدرجة إن بنات كتير قعدوا يضايقونى بكلامهم كل ما أمشى قدامهم
لكن سبحان الله وإذ فجأة حست المدرسة بتاعت العربى بكده وفهمتنى إنهم بيغيروا منى علشان جبت أعلى منهم فى الإمتحان الأ خير
أنا بقى صعقت من الكلام ده وحسيت بخجل كبير أوى إنى كنت مصاحباهم
وفضلت لمدة يومين متواصلين أعيط لأنهم طلعوا كده
ماما قالتلى إن ربنا أكيد كشفهملى علشان ربنا بيحبنى والمفروض إنى أحمد ربنا وإن ربنا هيعوضنى بصديقة أحسن بكتييييييييير منهم
وفعلا ربنا إستجاب لماما وبعد السنة دى ما خلصت أنا تعبت شوية وملقيتش حد جنبى غير واحدة بس من صديقاتى اسمها بيدل على شخصيتها طيبة جدا الوحيدة اللى وقفت جنبى
كانت بتذاكرلى اللى فايتنى من الدروس
وتجيبلى المدرسين بتوعها لحد البيت عندى وتيجى تاخد معايا دروسى
أنا حبيتها جدا وبصراحة هى كمان كانت بتحبنى ولحد دلوقتى أنا بقلها إنتى دعوة ماما المستجابة وصحوبيتنا ممتدة بقالها 5سنين
مقلتلكمش:
لما تعبت البنتين اللى أنا قلتلكم عليهم زارونى وبدأوا يرجعوا صداقتهم ليا تانى وأنا محكمتش عقلى وقلت مش مشكلة يمكن هما عرفوا إنهم غلطانين فى حقى
ورجعت تانى صاحبتهم بس برضه مسيبتش صاحبتى اللى وقفت جنبى ورغم إنها حذرتنى منهم إلا أنى قلتلها إنهم وقفوا جنبى فى محنتى ولازم مخذلهمش
ورجعت ريمة لعادتها القديمة
لما لاقونى منحازة لصديقتى الجديدة الغيرة ملت قلوبهم وفضلوا يعملوا فينا مقالب
لكن المرة دى أنا أخدت قرارى بنفسى إنى عمرى ما هثق فى أى حد إلا بعد لما أعرفة أولا كويس أوى
والحمد لله دلوقتى ربنا رزقنى باصحاب كويسين فى الجامعه وكفاية إنى برتاح لهم وبنقف مع بعض فى الخير إيد واحدة
ربنا يديم صداقتنا

هناك 11 تعليقًا:

مسدس صغير يقول...

ربنا يهدى سركو ويصلح الاحوال الجوية بينكم ويهديكو قولى امين.. بوست هايل

البت المشمشية حلوة بس شقية يقول...

الصداقة بقت عملة نادرة اوى اوى
كويس انك لقيتى اصحاب كويسين

*** حور- نور*** يقول...

مسدس صغير
ايه جو الشتا اللى دخلت بيه علينا ده متخافش احنا متقلين الهدوم

*** حور- نور*** يقول...

شوشو
وانتىالعملة النادرة دى بكام جنيه وأنا أبيعهملك ههههههههههه
انتى واحدة من أعز اصدقائى وانتى عارفة كويس أوى
وربنا يديم الصداقة

Unknown يقول...

الحكم دايما بالمواف فعلآ و العشره و الصداقات و العلاقات دي بتعتمد كتير علي الحظ

بوست جميل

عاشــــــ النقاب ـقــــة"نونو" يقول...

يااااااااااااااه دة الدنيا مليانة
واحمدي ربنا انهم عرفوا يكشفوا نفسهم بدري
فيه غيرهم بيتقن الموضوع وعلى بال ما بتكتشفيه يكون فات الاوان
ربنا ينور بصيرتك دوما يارب ويهدي سرك مع صديقة تتقي الله في صداقتك
تحياتي

*** حور- نور*** يقول...

عاشقة النقاب
شكرا لتشريفك مدونتى فقد زدتينى فخرا بكلماتك الرقيقة ودعواتك الصالحه
وان شاء الله هحاول اعمل بالنصيحه وهتشوفى الأجمل فى كل زيارة
شكرا لمرورك

شفـقــة و إحســــان يقول...

أصحب حاجتين اليومين دول هما :
1- الصديق الحقيقي الوفي
2- الزوجة لو مش نكدية
وإسأل مجرب

إحســــان

غير معرف يقول...

سحوره حبيبنى مبروك على البلوج ولو انها متأخره شويه فعلا الصداقه اليومين دول عمله نادره وياما خدت مقالب بس اقولك ربنا دايما بيكشفهم وبتتعرف حقيقتهم
يمكنك ان تخدع بعض الناس بعض الوقت ولكن لن يمكنك ان تخدع كل الناس كل الوقت
وسلام ياجميل

حاجــ عيال ــات يقول...

السلام عليكم

الصحفية الجميلة الحرة
كل وقت بنقابل فيه ناس جديدة وبنكون علاقات جديدة كل يوم في منها بيستمر معانا وفي اللي بيكون وقتي ..ودي طبيعة الحياة والتعاملات بتخلينا نجني الخبرة ..زي مانت اتعلمت كده انك ما تثقيش بحد غير لما تعرفيه كويس..دي خبرة
وهتفضلي تاخدي خبرات كده لغاية ما تنتهي الحياة وبرده هنكون ناقصين خبرات

ربنا يسعدك ويوفقك يارب
جهاد مشالي

محمد عبدالرحمن شحاته يقول...

مشكور على المواضيع الجميله وبقول ان احلى حاجه في الدنيا هي الصداقه رغم أنها شيئ نادر في الاوقات دي