مع سبق الاصرار والترصد
الحمد لله الامتحانات خلاص خلصت بحلوها ومرها
رغم ان اخر امتحان كان حلو حبتين وخرجنا كلنا معيطين
بس خلاص كلة خلص والحمد لله
وعبرنا القنال ياولاد
زغرطوا يا ولاد
وبعدين غطونا وصوتوا
المهم ان النتيجه مش هتظهر غير لما ندخل الترم التانى ودى حاجه حلوة اوى اوى
سيبكوا من كل التهييس اللى فوق ده:
ركزوا هنا
انا عملت مخطط جامد اوى اوى للاجازة وطبعا كالعادة اول يوم طلع فشنك
صحيت من النوم خير اللهم اجعلة خيرلقيت جبل من الغسيل وماما الأمورة العسولة قال لبسة هدوم الخروج ورايحة عند خالتى
وسمعت كده وانا بغسل وشى ان انا اللى هغسل الهدوم دى
صبرنى يا رب
لا وايه كل حاجة جاهزة
الغساله -والمساحيق- والاهم الغسيل اللى هيتغسل
وابتدى ابتدى ابتدى المشوار
وقضيت اجمد يوم فى حياتى بين الغسيل ونشير الهدوم وغسيل الاطباق
ولكن ماما لحقتنى فى الاخر
وطلعت نمت لكن بعد ايه
بعد ماانتهى اليوم وفضلت نايمة نايمة نايمة بحلم بالاجازة اللى انا ظبطها فى مخى مع سبق الاصرار والترصد
وشكلها كده هتحكم عليا بانى اقضى باقى الاجازة نايمة فى السرير
وهى دى عقوبة اللى يحلم ازاى هيقضى الاجازة
سيبوها للظروف
عموما مش مشكلة اول يوم احلى حاجه فى اجازتى ان شاء الله انى هبتدى اروح الجريدة تانى واكتب من جديد بعد ما كل اصحابى اللى هناك وحشونى زيكم بالضبط
ومن هنا وجاى هتابع اصحابى من المدونين والمدونات علشان ايام اللعب انتهت
والايام الجاية هتكون احلى ان شاء الله
وكفاية كده بقى علشان انتوا شكلكوا كده صدعتوا
يلا سلااااااااااااااااااااااااااااااااااااااااااااااام
والى اللقاء فى مغامرة جديدة من مغامرات ايام الاجازة
هناك 5 تعليقات:
اول تعليق
لولولوى
هيا الاجازة كدة يا اوختشى
غسيل وتنفيض ومواعين
بيطلع عينا
يلا بقه هنعمل ايه
وبعدين انتى لازم تحتجى الاجازة للعب
انا بنزل كل يوم العب فى الشارع بلعجلة والكورة بتاعتى
وبعدين متنسيش التاج بتاعى
salam alikom
ههههه
معلش متزعليش
اعتقد ده حال كل البناويت
لينا امل في الاجازة بس يا خسارة بصيص الامل بيطفي بماية المطبخ وغسيل الهدوم والنشر
بس اقولك على حاجة خليكي مسيطرة لو عندك اخوات اصغر منك....:)
اجازة سعيدة ان شاء الله
البت المشمشية
عندك حق والله نفسى العب دا انا حتى مش لاقية وقت اردلك على التاج لكن
اكيد هتشوفى حاجه قريب
وبعدين ابقى رنى عليا يا وحشة
رو ما
أكيد انتى كمان محشورة فى المطبخوحاسة بيا مش زى البت المشمشية
عمومايسعدنى تعليقك وجارى زيارة مدونتك
إرسال تعليق