إعدام ميت

إعدام ميت

تنتشر هذه الأيام خزعبلات كثيرة حول العدد الصينية التى اجتاحت السوق المصرى وأصبح المصريين يشرهون بالشراء منها

بصراحة هى مغرية جداًيعنى عدة بتشيل خطين وكمان بعضها فيه تليفزيون وراديو ومميزات تانية كتير أوى خلت الشعب المصرى كلة كبير وصغير شايلين عدد

وزى ما كل الناس اشترت كله دلوقتى عايز يبيع

تبيعوا إيه بس؟

العدة أصلا بتشتريها ب300 جنيه من غير ضمان لا وإية أنا فى مرة قريت لافتة فى محل بيع موبايلات بتقول المحل غير مسئول عن أى عدة صينى بعد خروجها من المحل

طب بالله عليكم لما هى من غير ضمان والمحل غير مسئول عنها يبقى ليه تقع فى المحظور وتشتريها

ولما تحب تبيعها بالكتير أوى تجيب 100 جنية يعنى تكمل عليهم وتشترى دبدوب صغير

ده كلة وبنقول مش لاقيين ناكل ومش لاقيين نشرب ومفيش حاجة الدولة موفراها يعنى الدولة تعمل إية ؟

تمشى ورا كل واحد وتقول يا جماعة متخلوش حد يضحك عليكم

الحكومة ما عليها غير إنها بتضع القوانين اللى بتحمى الشعب إحنا بقى بنعمل إيه؟

بنحط ثغرات فى القانون علشان نبيح لنفسنا كل حاجة وأى حاجة ونخلى الحرامى حاج والحاج بن.......

احنا اللى ضيعنا نفسنا

يعنى كل واحد فينا شايف إنه فى إيده حاجة ممكن الناس تشترى منها يبتدى يعلى السعر والناس يا عينى مجبرة تشترى

ده بيخلى اللى اشترى الحاجة دى غصب عنه يطلع عين الناس التانية فى حاجة تانية

خنقنا نفسنا

بوظنا الدنيا وخربناها

ليه وصلنا للحد ده

الموبايل بقى اللى بنتكلم عنه ده (الصينى )ممكن يكون اللى اخترعة واحد معداش 16 سنه بس لقى الإمكانيات اللى تخلية مخترع

يا ترى ده منه هو ولا من الدولة

أنا بيتهيألى بلاش نرمى كل حاجة على غيرنا ليه احنا منعدلش من نفسنا ونعمر الدنيا من حوالينا

دا أنا حصلى موقف غريب جدا خلانى أحس إنى مختلفة عن الناس

فى مرة كنت بنظف البيت فبكنس الفرانده واتكسفت اسيب الزبالة فى الشارع فكنست الشارع راحت جارتنا تقولى متقلليش قيمتك يا بنتى وتكنسى الشارع وتخلى الناس تتفرج عليكى أنا مكنتش عارفة أرد أقول إيه بس قلتلها يا حاجة أنا فى الأول والأخر بنت ولازم أعمل كل حاجة والنظافة شئ ميعيبش حد وبعدين اللى هيتفرج عليا ده مش ممكن يشوفنى برضه وأنا بنظف البيت من جوه وأصلا هو أنا كام مرة بنظف هو أنا فاضية

هى دى السلبية

فيها إيه لما تمشى على طبيعتك وتسيبك من كلام الناس

كل إنسان فينا جواه خير بس لو استغله صح دا ربنا نفخ فينا من روحه يعنى أكيد فينا ولو1.......,من صفات الله عز وجل يبقى لازم نعمل اللى يرضى ربنا عننا وبلاش سلبية وكل واحد يمشى بدماغة فى إطار العادات والتقاليد اللى اتربينا عليها

ونسيب الصين فى حالها ونشتغل احنا

بدل ما فى يوم من الأيام نلاقى العرسان كمان بقت صينى

ياااااااااااااااااااااااااااااااااااااااااااااااااااااااااااالله

عيد بلا أم

تعودت كل عيد أم أن أقبل أمى من جبينها رغم أنى يوميا أقبلها ولكن فى هذا اليوم بالذات بتبقى القبلة دى حاجة تانية وطعم واحساس تانى خالص

ماما بصراحة من أجمل الأمهات اللى فى الدنيا إنسانة متواضعة جدا تحترمنى وتحترم عقليتى التى تفتحت مبكرا تسمعنى وأشكولها بتحبنى جدا دايما أسمعها بتحكى عنى كويس

أنا كمان كل أصحابى بيحسدونى عليها ومش مصدقين أصلا إنها مامتى ودايما يقولولى إزاى واحدة ملاك زى مامتك واسمها نور الهدى تجيب عفريتة زيك وكمان اسمك سحر

علشان كده سمونى حور نور تبعا لاسم ماما وانا كمان بحب الاسم ده اوى ومشهورة بيه دا انا حتى قربت انسى اسم سحر

فاسم حور لأنهم يعتقدون أنى حورية من السماء كما أطلقها على مدرسى المدرسة الثانوية وأصدقائى ومن حولى من الناس نسبة لأخلاقى معهم وتعاملاتى الطيبةأما نور فهو الاسم الأول من إسم أمى

أمى بقى هى أجمل شئ فى حياتى بحبها أوى ونفسى أقدم لها أى حاجة فى عيد الأم

وبمناسبة عيد الأم بقى كنت بعمل تحقيق عن عيد الأم اسمة عيد بلا أم وأم بلا عيد

بصراحة كان نفسى أكمله وأنشره بس بلدنا دى بلد تصريحات وعلشان أدخل أى مكان لازم أدخل بتصرح وعلشان تجيب التصريح دى عايزة سنه تكون المناسبة خلصت وياريت أصلا التصريح بيطلع

أنا بقى رحت ملجأأيتام فى بنها وكان يوم جمعة قلت بقى ايه أروح كأنها زيارة عادية وبدون أى صفة رسمية دخلت وقعدت مع الأطفال اللى جوة بصراحة حبيتهم جدا وكمان كانوا بيقولولى يا ماما أنا قضيت معاهم وقت جميل جدا حمدت فية ربنا على نعمة الأم

وبعد ما خلصت وأخدت صور وسجلت مع الأمهات فى الدار حصلت حاجة غريبة

بنوتة زى القمر عندها 16 سنه جات جنبى وقالتلى انتى اسمك ايه قلتلها اسمى سحر قالتلى عندك كام سنه قلتلها عشرين قالتلى ياااااااه دا إنتى صغيرة أوى

ضحكتلها وقلتلها يااااااااه وانتى كبيرة أوى

المهم البنت دى كانت خلاص عايزة تتكلم معايا بخصوص موضوع أو عايزة تشتكى من حاجة بس للأسف المشرفة جات والبنت غمزتلى علشان أسكت فسكت المشرفة أصلا شكلها يخوف لابسه نظارة بنى وهى أصلا أعوذ بالله من الصنف ده عاملة زى المخبر ياترى عاملة اية فى البنات دى

كان نفسى أعرف البنت دى كانت عايزة تحكيلى ايه بس مقدرتش أعرف ومشيت ومكانش ينفع أروح تانى إلا بتصريح حلفت إنى لازم أروح تانى علشان أعرف بس فى ايه البنت دى مالها وعايزة تقول ايه وليه خايفة أوى كده وليه المشرفة مرضيتش تقعدنى معاها

رحت مديرية الأمن علشان أجيب تصريح الضابط بصراحة قابلنى كويس لأنه يعرفنى قبل كده كنت بروح أجيب منه الحوادث قاللى التصريح مش من عندنا روحى المحافظة رحت المحافظة وقابلت مدير العلاقات العامة اللى قابلنى باحترام شديد ولما قلتله عالتصريح قاللى والله يا بنتى انتى عارفة أنا بحبك قد ايه بس التصريح دة مش من عندنا روحى مديرية التضامن الاجتماعى

رحت المديرية وقابلت الوكيل راجل خنيق جدا اسمه استاذ جمال مرضيش يدينى تصريح ولا حاجة وكأنه خايف إنى أدخل هناك أحسن أفضحهم

معرفش بصراحة ايه اللى مخوفهم

ودلوقتى مش عارفة أعمل ايه أو أقابل البنت دى إزاى داأنا حتى معرفش اسمها علشان أسأل عليها فى المدارس

ربنا يكون فى عونها وعون اللى زيها فعلا والله الأم دى نعمة كبيرة جدا ربنا مايحرمش أى أولاد من أمهم ويخليكى ليا يا ست الحبايب يا حبيبة

وادبست فى جوازة

وادبست فى جوازة

ياريتنى ما عاكست ابنها ولا ركبت القطر أصلا

قطر إيه ياريتنى ما خرجت من بيتنا من الأساس

بداية القصة

وزى كل يوم خارجة رايحة الجامعة كان عندى محاضرة الساعه 11

وركبت قطر الساعة 9 اللى بيوصل بلدنا اصلا 10 الا ثلث يعنى قمة الذل

لا وإيه النهارده الاثنين يعنى فى سوق فى بنها والستات القمامير راكبين بقى والقطر محمل من خيرات ربنا

(أقفاص واسبات وشنط وأرانب وبط وفراخ وكل حاجه )

طيب والنبى الناس معاها الحاجات دى وهى رايحة السوق تخيلوا بقى وهما جايين بيبقى شكل القطر ازاى

أنا بقى متعودة أركب فى العربية الثالثة من القطر مع اصحابى المرة دى ملحقتهاش فركبت فى العربية الرابعة وكنت وانا واقفة شايفة اصحابى وعمالين يشاورولى ويضحكوا ورجعوا علشان ياخدونى ويطلعونى العربية التالته بس انا مستحيل انى اتحرك جوه القطر يعنى اذا عرفت اتنقل بين العربيات مش هسلم من التعليقات السخيفة من الشباب

فاضطريت انى اقف لوحدى ومن وقت للتانى ابص لاصحابى واضحك

والحمد لله وقفت جنب ست زى القمر وابنها عثول مووووووووووووت وعمال يضحكلى وماسك فى ايده بسكويت ضحكتله واديتله مصاصة كانت فى شنطتى وقعدت العب معاه واتكلم هو بقى حب يردهالى كان عايز يدينى بسكويت ومامته تقولى خديه ده مش بيدى لأى حد الظاهر إنى عجبته

أخدت البسكويت منه علشان ماكسفهوش وحطيته فى ايدى

الولد بقى راسه وألف جزمة إنى أكلها قدامه يابنى مش عايزة

مفيش

والله مش عايزة

ولا كأنه سامع حاجه

اضطريت فى الأخر إنى أكلهاوسط تشجيع المتفرجين وضحكات العواجيز

وتتالى الكلمات والتعليقات

يابنتى كليها ده لسه زغنون\ متتكسفيش ياحلوة\دا قد أخوكى الصغير

وفجأة وبدون أى مقدمات

الولد مسك إيد مامته وقالها ماما أنا عايز أتجوزها

مش قادرة أقولكم أنا وشى جاب ميت لون وأنا بقى بعيد عنكوا خدودى بتحمر ومش بعرف أدارى كسوفى والدنيا فجأة حررت وإسودت

والضحك ملى العربية والعيون ابتدت تتابعنى

الولد جه جانبى وقالى ها موافقة أنا بابا عاملى شقة وفيها كمبيوتر وألعاب كتير تقدرى تلعبى بيها لوحدك أنا مش عايزها وكمان هجيبلك مصاصة وشيكولاته وحاجه حلوة وهخلى ماما تعملك من الجيلى بتاعى

أنا احترت الولد واخد الموضوع بجد بينى وبينكم فرصة مش هتتعوض جيلى وشيكولاته ومصاصة يا حلاوة يا ولاد جوازة ولا فى الأحلام

المهم ضحكت وقولتله بص يا حبيبى مش اللى عايز يتجوز واحد ة يقول لأهلها الأول

الود طلع متفهم جدا وقالى ماهما مش هيوافقوا لأنى لسه صغير قلتله طيب ايه رأيك استناك لما تكبر كل ده وانا مش سامعه ولا صوت فى القطر غير صوتى الكل واقف بيسمع مندهش

وفى الأخر وصلنا والولد ماسك فى ايدى ومش عايز يخلينى أنزل وياإما ينزل معايا ياإما أروح معاه قلتله انت هترجع فى قطر الساعة كام ؟

قالى مش هنرجع فى القطر علشان بابا هياخدنا بالعربية

المهم فى الاخر الولد مرضيش ينزل إلا لما مامته شدته بالعافية وفضل يعيط

اتضح بقى انه وحيد يا عينى ومالوش اخوات يلعب معاهم ومعندوش صحاب فى المدرسة لانه لسه داخلها جديد اصلهم لسه راجعين من السعودية

وضيعت جوازة ولا فى الأحلام